భారతీయ సంస్కృతిలో ప్రతి పండుగకు ఓ ప్రత్యేకత. ప్రతి దానిలోఆరోగ్యరహస్యాలు ఇమిడి ఉంటాయి. పర్యావరణ పరిరక్షణ లక్ష్యంతో ఏర్పాటు చేయబడిందే వినాయక చవితి పండుగ.
విశేష రూపం గలవాడు కనుక వినాయకుడు అనే పేరు వచ్చింది. గణాలకు నాయకుడు కాబట్టి గణపతి అని కూడా పిలుస్తారు. నాయకునిలోని అన్ని లక్షణాలు వినాయకునిలో ఉన్నాయి. నాయకత్వ లక్షణాలకు ప్రతీక వినాయకుడు. ఉపద్రవ కారుకులైన గణములన్నింటిని నియంత్రించి, గణపీడన తొలగించడానికి గణాలకు అధిపతిగా వినాయకుణ్ణి నియమిం చాడు శివుడు.
ఎవరైతే ప్రథమ పూజలను గణపతికి చేస్తారో వారి కార్యక్రమాలకు ఎటువంటి ఆటంకాలు రాకుండా చూడాలని గణపతికి శంకరుడు ఆనతిచ్చాడు. నాటి నుండి గణపతి ప్రథమ పూజితుడుగా పూజలందుకుంటున్నాడు. బుద్ధి, సిద్ధి సహిత గణపతికి మహా గణపతి అంటారు. 18 రకాల విద్యల ఆధిపత్యం కూడా మహాగణపతికే అప్పగించటం వల్ల ఈయన విద్యాపతి కూడా అయ్యాడు. విద్యారంభానికి ముందు, ప్రతి వినాయక చవితికి విద్యార్థులు తప్పకుండా గణేశపూజ చేస్తారు.
