`జాతిర‌త్నాలు` బ్యూటీని అక్కినేని హీరోలు వ‌దిలేలా లేరుగా!

ఫరియా అబ్దుల్లా.. ఈ బ్యూటీ గురించి ప‌రిచ‌యాలు అవ‌స‌రం లేదు. హైదరాబాదులోని బంజారాహిల్స్ లో జన్మించిన ఈ ముద్దుగుమ్మ‌.. `జాతిరత్నాలు` మూవీతో టాలీవుడ్‌లోకి హీరోయిన్‌గా అడుగు పెట్టింది. నవీన్‌ పొలిశెట్టి హీరోగా అనుదీప్ కెవి ద‌ర్శ‌క‌త్వంలో రూపుదిద్దుకున్న ఈ చిత్రం 2021లో విడుద‌లై బ్లాక్ బ‌స్ట‌ర్ హిట్‌గా నిలిచింది.

ఈ మూవీ సాధించిన విజ‌యంతో ఫ‌రియా ద‌శ తిరిగిన‌ట్టే అని అంద‌రూ భావించారు. కానీ, అలా జ‌ర‌గ‌డం లేదు. అడ‌పా త‌డ‌పా ఆఫ‌ర్ల మిన‌హా.. భారీ ప్రాజెక్ట్‌ల నుండి ఈమెకు అవ‌కాశాలు రావ‌డం లేదు. ప్ర‌స్తుతం ఈ బ్యూటీ మాస్ మ‌హారాజ్ ర‌వితేజ‌కు జోడీగా `రావణాసుర`లో న‌టిస్తోంది. `బిచ్చగాడు` ఫేమ్ విజయ్ ఆంటోనికి జోడీగా `వల్లి మయిల్` అనే సినిమా చేస్తోంది.

వీటితో పాటే ఐటెం సాంగ్స్‌కు కేరాఫ్‌గా మారుతోంది. ఈ మ‌ధ్యే ఫరియా అక్కినేని నాగార్జున‌, ఆయ‌న త‌న‌యుడు నాగ‌చైత‌న్య క‌లిసి న‌టించిన `బంగార్రాజు` చిత్రంలో ఐటెం సాంగ్ చేసి అద‌ర‌గొట్టింది. అయితే ఇప్పుడు ఈమెకు మ‌రో ఐటెం సాంగ్ చేసే అల‌వాటు వ‌చ్చింద‌ట‌. అది కూడా అక్కినేని హీరో మూవీ నుండే అట‌.

అఖిల్ అక్కినేని, సురేంద‌ర్ రెడ్డి కాంబినేష‌న్‌లో `ఏజెంట్‌` అనే మూవీ రూపుదిద్దుకుంటున్న సంగ‌తి తెలిసిందే. స్పై థ్రిల్లర్‌గా తెరకెక్కుతోన్న ఈ సినిమాలో సాక్షి వైద్య హీరోయిన్‌గా న‌టిస్తుంటే.. మలయాళ సూపర్ స్టార్ మమ్ముట్టి కీల‌క పాత్ర‌ను పోషిస్తున్నాడు. శ‌ర‌వేగంగా షూటింగ్ కంప్లీట్ చేసుకుంటున్న ఈ చిత్రంలో ఓ అదిరిపోయే ఐటెం సాంగ్ ఉంద‌ట‌. ఆ సాంగ్ కోసం మేక‌ర్స్ ఫ‌రియాను ఎంపిక చేశార‌ని.. ఇప్ప‌టికే సంప్ర‌దింపులు కూడా పూర్తి అయ్యాయ‌ని అంటున్నారు. దీనిపై త్వ‌ర‌లోనే అఫీషియ‌ల్ అనౌన్స్‌మెంట్ కూడా రానుంద‌ని నెట్టింట టాక్ న‌డుస్తోంది. దీంతో ఫ‌రియాను అక్కినేని హీరోలు వ‌దిలేలా లేరంటూ నెటిజ‌న్లు కామెంట్స్ చేస్తున్నారు.