`ఇస్మార్ట్ శంకర్`.. ఈ మూవీని తెలుగు ప్రేక్ష‌కులు అంత త్వ‌ర‌గా మ‌ర‌చిపోలేరు. టాలీవుడ్ ఎన‌ర్జిటిక్ రామ్ పోతినేని, డైనమిక్ డైరెక్టర్ పూరీ జాగ‌న్నాథ్ కాంబినేష‌న్‌లో రూపొందిన మాస్ ఎంట‌ర్టైన‌ర్ ఇది. నిధి అగర్వాల్‌, నభా నటేష్ హీరోయిన్లుగా న‌టించిన ఈ చిత్రం 2019లో విడుద‌లై బ్లాక్ బస్ట‌ర్ హిట్‌గా నిలిచింది.
అప్ప‌టి వ‌ర‌కు ల‌వ‌ర్ బాయ్‌గా ఉన్న రామ్.. ఈ మూవీతో మాస్ హీరోగా మాంచి క్రేజ్ సంపాదించుకున్నాడు. అంతేకాదు, ఈ సినిమా త‌ర్వాత రామ్ మాస్ క‌థ‌ల వైపే మొగ్గు చూప్పుతూ ముందుకు సాగుతున్నాడు. ఇక‌పోతే త్వ‌ర‌లోనే ఈయ‌న `ది వారియ‌ర్‌`తో ప్రేక్ష‌కుల‌ను ప‌ల‌క‌రించ‌బోతున్న సంగ‌తి తెలిసిందే.
త‌మిళ ద‌ర్శ‌కుడు ఎన్‌.లింగుసామి రూపొందించిన ఈ చిత్రంలో కృతి శెట్టి హీరోయిన్‌గా న‌టిస్తే.. ఆది పినిశెట్టి విలన్ పాత్రను పోషించారు. పవన్ కుమార్ సమర్పణలో శ్రీనివాసా సిల్వర్ స్క్రీన్ పతాకంపై శ్రీనివాసా చిట్టూరి నిర్మించిన ఈ చిత్రం జూలై 14న తెలుగు, త‌మిళ భాష‌ల్లో గ్రాండ్ రిలీజ్ కాబోతోంది. ఈ నేప‌థ్యంలోనే మేక‌ర్స్ జోరుగా ప్ర‌చార కార్య‌క్ర‌మాల‌ను నిర్వ‌హిస్తుండ‌గా.. రామ్ తాజాగా ఓ ఇంట‌ర్వ్యూలో పాల్గొన్నాడు.
ఈ ఇంట‌ర్వ్యూలో రామ్ `ఇస్మార్ట్ శంకర్` గురించి మాట్లాడుతూ ఆసక్తికర కామెంట్స్ చేశారు. `ఇస్మార్ట్ శంకర్ వంటి ఒక సినిమా నా కెరియర్లో పడటం నా అదృష్టం. నేను లేకపోతే ఆ సినిమా లేదు అని పూరి గారు అనడం ఆయన సంస్కారం. కానీ ఆ సినిమాను పూరిగారు మాత్రమే తీయగలరు అనేది నా అభిప్రాయం. ఆ సినిమా మాదిరిగానే ది వారియ‌ర్‌ను కూడా ఆదరిస్తారనే నమ్మకం నాకు ఉంది` అంటూ చెప్పుకొచ్చాడు. దీంతో ఈయ‌న కామెంట్స్ కాస్త నెట్టింట వైర‌ల్‌గా మారాయి.
