మాచర్ల నియోజకవర్గం యూత్ స్టార్ నితిన్, యంగ్ బ్యూటీ కృతి శెట్టి జంటగా నటించిన చిత్రం `మాచర్ల నియోజకవర్గం`. ఈ మూవీతో ఎం. ఎస్. రాజశేఖర్ రెడ్డి అనే దర్శకుడు ఇండస్ట్రీకి పరిచయం అయ్యాడు. శ్రేష్ట్ మూవీస్ బ్యానర్పై సుధాకర్ రెడ్డి, నిఖిత రెడ్డి ఈ మూవీని నిర్మించారు.
కేథరిన్ థ్రెసా, సముద్రఖని, శుభలేఖ సుధాకర్, బ్రహ్మాజి, మురళిశర్మ, రాజేంద్రప్రసాద్ తదితరులు ఇందులో కీలక పాత్రలను పోషించారు. పొలిటికల్ బ్యాక్ డ్రాప్లో మాస్ యాక్షన్ ఎంటర్టైనర్ గా రూపుదిద్దుకున్న ఈ చిత్రం ఆగస్టు 12న భారీ అంచనాల నడుమ విడుదలై.. బాక్సాఫీస్ వద్ద బొక్క బోర్లా పడింది.
వరుస ఫ్లాపులతో సతమతం అవుతున్న నితిన్.. ఈ సినిమా అయినా హిట్ కొట్టాలని ఆశ పడ్డాడు. కానీ, ఆయన ఆశ నిరాశే అయింది. ఇకపోతే `మాచర్ల నియోజకవర్గం` ఓటీటీలోకి వచ్చేందుకు రెడీ అవుతోంది. ఈ మూవీ డిజిటల్ స్ట్రీమింగ్ హక్కులను ప్రముఖ ఓటీటీ దిగ్గజం అమెజాన్ ప్రైమ్ సొంతం చేసుకుంది.
అయితే బాక్సాఫీస్ వద్ద ఈ మూవీ పెద్దగా ప్రభావం చూపకపోవడంతో.. అమెజాన్ వారు ఆలస్యం చేయకుండా ఓటీటీలోకి దింపేస్తున్నారు. సెప్టెంబర్ 10 నుంచి ఈ మూవీ అమెజాన్ ప్రైమ్లో స్ట్రీమింగ్ అవ్వబోతోందట. దీనిపై అధికారిక ప్రకటన రావాల్సి ఉంది. కాగా, ఇటీవల కొన్ని సినిమాలు బిగ్ స్క్రీన్ పై అలరించలేకపోయినా.. ఓటీటీలో హిట్ అవుతున్నాయి. మరి `మాచర్ల నియోజకవర్గం` కూడా ఓటీటీలో హిట్ అవుతుందేమో చూడాలి.