సమంతతో టాలీవుడ్ రౌడీ బాయ్ విజయ్ దేవరకొండ ప్రేమలో పడిపోయాడట. ఈ విషయాన్ని ఆయన ఓపెన్గా చెప్పేశారు. పూర్తి వివరాల్లోకి వెళ్తే.. సమంత ప్రధాన పాత్రలో తెరకెక్కిన తాజా చిత్రం `యశోద`. హరి-హరీష్ ద్వయం దర్శకత్వం వహించిన ఈ చిత్రాన్ని శ్రీదేవి మూవీస్ బ్యానర్ పై శివలెంక కృష్ణప్రసాద్ నిర్మిస్తున్నారు.
ఇందులో వరలక్ష్మి శరత్ కుమార్, ఉన్ని ముకుందన్, రావు రమేశ్, మురళీ శర్మ, సంపత్ రాజ్ తదితరులు కీలక పాత్రల్లో కనిపించబోతున్నారు. నవంబర్ 11న ఈ చిత్రం తెలుగుతో పాటు తమిళ్, కన్నడ, మలయాళ మరియు హిందీ భాషల్లో విడుదల కాబోతోంది. తాజాగా ఈ సినిమా ట్రైలర్ బయటకు వచ్చి విశేష స్పందనను దక్కించుకుంది.
అయితే తెలుగులో ఈ సినిమా ట్రైలర్ను విజయ్ దేవరకొండ విడుదల చేశాడు. ఈ సందర్భంగా ఆయన మాట్లాడుతూ.. `కాలేజీ రోజుల్లో సమంతను మొట్టమొదటిసారిగా స్క్రీన్ పై చూసి అభిమానిగా మారిపోయాను. అప్పుడే ఆమెతో ప్రేమలో పడిపోయాను. సమంత ఏంచేసినా నేను ఆమెను అభినందిస్తున్నాను మరియు ఆరాధిస్తాను` అంటూ సమంతపై తన అభిమానాన్ని చాటుకున్నాడు.
అలాగే యశోద ట్రైలర్ను మీ అందరితో పంచుకున్నందుకు చాలా సంతోషంగా ఉందని విజయ్ దేవరకొండ పేర్కొన్నాడు. దీంతో ఈయన కామెంట్స్ కాస్త నెట్టింట వైరల్గా మారాయి. కాగా, సమంత-విజయ్ దేవరకొండ జంటగా ప్రస్తుతం `ఖుషి` అనే మూవీ చేస్తున్నారు. శివ నిర్వాణ దర్శకత్వంలో రూపుదిద్దుకుంటున్న ఈ ప్రేమ కథా చిత్రం త్వరలోనే ప్రేక్షకుల ముందుకు రాబోతోంది.