కొన్ని సార్లు పొగడ్తల కంటే తిట్లే చాలా మంచిగా అనిపిస్తాయి. అవే మన సక్సెస్ కు కారణం అవుతాయి కూడా.. ఇట్లాంటి విషయమే ఈ మధ్య ఒకటి వెలుగులోకి వచ్చింది. అదే అప్పటి మందం హోటల్.
అయితే ఇదేం పేరు అని ప్రశ్న రావొచ్చు. ఈ పదం తెలంగాణ వాళ్లకు చాలా సుపరిచితమే. దీనికి అర్థం తాత్కాలికం అని. అప్పటి అవసరాలను తీర్చుకునే ప్రయత్నాన్ని అప్పటి మందం అని పిలుస్తారు. అయితే ఈ పదమే ఒక వ్యక్తి జీవితానికి దారి చూపింది. ఇదే పేరు తన వ్యాపారానికి ఉపయోగ పడింది.
కరీంనగర్ జిల్లా వెంకట్రావుపల్లికి చెందిన ఉయ్యాల లచ్చయ్య గౌడ్ అనే వ్యక్తి అప్పటి మందం పేరుతో 10ఏండ్లుగా హోటల్ను నడుపుతూ జీవిస్తున్నాడు. అయితే ఆయన ఆ పేరు పెట్టడానికి పెద్ద కథే ఉంది.
లచ్చయ్య గౌడ్ తన కుటుంబాన్ని పోషించేందుకు ఎన్నో పనులు, మరెన్నో ప్రయత్నాలు చేశాడు.కూలీ నాలీ చేసినా, కుల వృత్తిలో భాగంగా కళ్లు గీసినా తన ఆర్థిక అవసరాలు మాత్రం తీరలేదు. ఆర్థిక అవసరాలను తీర్చుకోవడానికి సౌదీ, దుబాయ్ లాంటి దేశాలకు వలస కూలీగా కూడా వెళ్లొచ్చాడు.
అయినా మార్పు రాకపోయేసరికి ఆ తర్వాత మళ్లీ కులవృత్తిలోకి వచ్చాడు. ఇలా ఒక పని మీద ధ్యాసపెట్టి చేయకపోవడాన్ని చూసిన గ్రామస్తులు లచ్చయ్యను అప్పటి మందం గాడివి అని కామెంట్ చేసేవాళ్ళు. ఇలా తనను కామెంట్ చేసే పేరుతో లచ్చయ్య హోటల్ స్టార్ట్ చేసి మంచి లాభాలు పొందుతున్నాడు. పట్టుదల ఉంటే ఎప్పటికైనా సక్సెస్ కావొచ్చని లచ్చయ్య చెబుతున్నాడు.