కరోనా వైరస్ విజృంభిస్తున్న నేపథ్యంలో ప్రపంచంలోని పరిశోధకులంతా వ్యాక్సిన్, కనిపెట్టడంలో బిజీగా ఉన్న సంగతి తెలిసిందే. అయితే, తాజా అధ్యయనంలో ఓ ఆస్తికరమైన విషయం తెలిసింది. స్వీడన్‌కు చెందిన లైఫ్ సైన్స్ సంస్థ ‘ఎంజైమాటికా’ (Enzymatica) గుడ్‌న్యూస్ చెప్పింది. ‘కోల్డ్ జైమ్’ ( ColdZyme) అనే మౌత్ స్ప్రేతో కరోనాను కట్టడి చేయొచ్చని పేర్కొంది. కరోనాకు కారణమైన SARS-CoV-2 (కోవిడ్-19) వైరస్‌ను నాశనం చేస్తుందని, దీనివల్ల ఎలాంటి సైడ్ ఎఫెక్ట్స్ ఉండవని ప్రకటించింది.
ఇది సాధారణ జలుబు కోసం తయారు చేసిన మౌత్ స్ప్రే అని, ఇందులో గ్లేసెరాల్, అట్లాంటిక్ కాడ్ ట్రైప్సిన్ సొల్యూషన్లు ఉంటాయని సంస్థ పేర్కొంది. ప్రాథమిక పరిశోధనల్లో ఈ స్ప్రే 20 నిమిషాల్లోనే 98.3 శాతం కరోనా వైరస్‌ను నాశనం చేసిందని తెలిపింది. అమెరికాకు చెందిన మైక్రోబాక్ లేబొరేటరీస్ టెస్టు మెథడ్‌లో, ఇన్ విట్రో పర్యవేక్షణలో ఈ అధ్యయనం జరిగిందని పేర్కొంది. నోటి ద్వారా వ్యాపించే వైరస్‌ల నివారణ కోసం ఈ స్ప్రేను తయారు చేశామని, తాజాగా అధ్యయనంలో ఇది కరోనా వైరస్‌ను నాశనం చేయడంలో ఎంతవరకు పనిచేస్తుందనే విషయాన్ని తెలుసుకున్నామని తెలిపింది. ఈ మౌత్ స్ప్రే వల్ల వైరస్ ప్రభావాన్ని కొంతవరకైనా తగ్గించి.. తక్షణ వైద్యం ద్వారా కరోనా నుంచి కోలుకోవచ్చని ఆ సంస్థ ఆశాభావం వ్యక్తం చేస్తోంది. అయితే, మార్కెట్లో పూర్తిగా అందుబాటులో ఉండేందుకు మరికొన్ని క్లినికల్ టెస్టులు నిర్వాహించాల్సి ఉన్నట్లు తెలిసింది.గమనిక: కరోనా లక్షణాలు కనిపిస్తే తప్పకుండా పరీక్షలు చేయించుకుని చికిత్స పొందగలరు. ఈ కథనం కేవలం మీ అవగాహన కోసమేనని గమనించగలరు.
