Cooking: వంట చేయడం కూడా ఒక కళ.. వంట చేసేటప్పుడు మనసును అక్కడే లగ్నం చేసి చేయాలి.. అలా ఆ వంట అద్భుతః.. లేదంటే ఏదో ఒకటి మిస్స్ అయ్యి రుచిగా ఉండదు.. ఇంతకీ ఇప్పుడెందుకు ఇందంతా అంటారా..!? వంట చేస్తే బోలెడు ప్రయోజనాలు.. ఆ సమస్యలు హుష్ కాకీ..!
మీ మనసు బాగోలేనప్పుడు ఒకసారి వంటింట్లోకి వెళ్ళండి. కూరగాయలు తరగండి. నచ్చిన వంటలు మహారుచిగా వండండి. ఆనందంగా ఆరగించండి. అంతే మీ ఒత్తిడి, టెన్షన్ పరార్.. ఒక్కసారి వంటింట్లోకి అడుగు పెడితే ఎలాంటి ఒత్తిడి అయినా పటాపంచలై పోవాల్సిందే అని సలహా ఇస్తున్నారు పరిశోధకులు. స్వయంగా వంట చేసుకోవడం వల్ల మానసిక ఆరోగ్యం మెరుగుపడుతుందని అమెరికాలోని ఎడిత్ కోవాన్ యూనివర్సిటీ నిర్వహించిన అధ్యయనంలో తేలింది. 657 మందిపై ఆరు నెలల పాటు నిర్వహించిన ఈ అధ్యయనంలో పలు ఆసక్తికర విషయాలు వెల్లడయ్యాయి.
వంట చేయడం వల్ల ఆత్మవిశ్వాసం రెట్టింపు అవుతుందని.. చేయాల్సిన పనిపై శ్రద్ధ పెరుగుతుందని.. ఆరోగ్యకరమైన ఆహారపు అలవాట్లు ఆలవరుచుకుంటారని.. మొత్తానికి మానసిక ఆరోగ్యం సెట్ అవుతుందని తేల్చి చెప్పారు. కోపాన్ని, బాధను మర్చిపోయేందుకు వంటిల్లు సరైన ప్లేస్ అని చెబుతున్నారు అమెరికన్ పరిశోధక బృందం. మీరు కూడా మీ మనసు బాగోలేనప్పుడు ఒకసారి వంట చేసి చూడండి. ఆ ఫలితాలను మీరే ఆస్వాదించవచ్చు.