క‌రోనా ఏమోగానీ ప్ర‌స్తుతం అధిక‌శాతం మంది ఒత్తిడి మూలంగా స‌మ‌స్య‌ల‌ను ఎదుర్కొంటున్నారు. ఇప్ప‌టికే అనేక మందికి నిత్యం ఆర్థిక స‌మ‌స్య‌లు, వ్య‌క్తిగ‌త, ఆఫీసు స‌మ‌స్యల కార‌ణంగా ఒత్తిడి ఎదుర‌వుతోంది. దీనికి ఇప్పుడు క‌రోనా కూడా తోడైంది. దీంతో ఆందోళ‌న భ‌రించ‌లేక‌పోతున్నారు. తీవ్ర‌మైన డిప్రెష‌న్, ఇత‌ర మాన‌సిక స‌మ‌స్య‌ల‌కు లోన‌వుతున్నారు. అయితే నిత్యం 10 నిమిషాల స‌మ‌యాన్ని రెండు పనుల కోసం కేటాయిస్తే ఒత్తిడి నుంచి దాదాపుగా బ‌య‌ట ప‌డ‌వ‌చ్చ‌ని సైంటిస్టులు చేప‌ట్టిన అధ్య‌య‌నాల్లో వెల్ల‌డైంది.
కాన్‌స్టోన్ యూనివ‌ర్సిటీ ప‌రిశోధ‌కులు ఒత్తిడిని ఎదుర్కొంటున్న కొంద‌రిపై ప్ర‌యోగాలు చేసి చూశారు. వారిలో కొంద‌రిని 10 నిమిషాల పాటు త‌ల‌పై మ‌సాజ్ చేసుకోమ‌న్నారు. కొంద‌రిని రెస్ట్ తీసుకోమ‌ని చెప్పారు. ఈ క్ర‌మంలో తేలిందేమిటంటే.. 10 నిమిషాల పాటు మ‌సాజ్ చేసుకున్నా, రెస్ట్ తీసుకున్నా ఫ‌లితం ఒక్క‌టేలా ఉంద‌ని, చాలా మంది ఒత్తిడి నుంచి దాదాపుగా బ‌య‌ట‌ప‌డి రిలాక్స్ అయ్యార‌ని.. దీంతో వారు ప్ర‌శాంతంగా మారిపోయార‌ని.. సైంటిస్టులు గుర్తించారు.
అందువ‌ల్ల ఎవ‌రైనా స‌రే నిత్యం తీవ్ర‌మైన స్ట్రెస్‌ను ఎదుర్కొంటుంటే వారు రోజులో ఎప్పుడైనా క‌నీసం 10 నిమిషాల పాటు త‌ల‌పై మ‌సాజ్ చేసుకున్నా లేదా 10 నిమిషాల పాటు విశ్రాంతి తీసుకున్నా.. ఒత్తిడి మ‌టుమాయ‌మ‌వుతుంద‌ని చెబుతున్నారు. కాగా సైంటిస్టులు చేప‌ట్టిన పై ప్ర‌యోగం, అధ్య‌య‌నానికి చెందిన వివ‌రాల‌ను ఇటీవ‌లే సైంటిఫిక్ రిపోర్ట్స్ అనే జ‌ర్న‌ల్‌లోనూ ప్ర‌చురించారు.
