కాన్సర్ నుండి కాపాడే ఆహార పదార్ధాలు ఏమైనా ఉన్నాయా? లేవన్నదే ఈ ప్రశ్నకు సమాధానం. అయితే కాన్సర్ వచ్చే ప్రమాదాన్ని తగ్గించే ఆహార పదార్ధాలు మాత్రం కొన్ని ఉన్నాయి. కాన్సర్ ప్రమాదాన్ని తగ్గించే గుణం ఉన్న ఆహార పదార్ధాలు ఏమిటో, వాటికి ఆ గుణం ఎందుకు వచ్చిందో తెలుసుకుందాం.
యాపిల్స్: ఈ పండులో పోలీఫెనాల్స్ ఉంటాయి. ఇన్ఫెక్షన్స్, గుండె సంబంధ వ్యాధులను తగ్గించే గుణం పోలీఫెనాల్స్కు ఉంది. వీటికి యాంటీ కాన్సర్ గుణాలు కూడా ఉన్నట్లు ఇటీవలి పరిశోధనలో బయటపడింది.
బెర్రీ పండ్లు: బెర్రీల్లో విటమిన్లు, ఖనిజ లవణాలు, పీచు ఎక్కువగా ఉంటాయి. ఈ పళ్లకు యాంటాక్సిడెంట్ గుణాలు ఎక్కువ. బ్లాక్ బెర్రీల్లో ఉండే యాంథోసయానిన్ అనే జీవ రసాయనం పెద్దపేగు కాన్సర్ విషయంలో పని చేస్తున్నట్లు ఒక అధ్యయనంలో తేలింది. బ్లూ బెర్రీలకు బ్రెస్ట్ కాన్సర్ను నిరోధించే గుణం ఉన్నట్లు కూడా తేలింది.
క్రూసిఫెరస్ కాయగూరలు: బ్రొకోలీ, కాలిఫ్లవర్ వంటి కాయగూరలు ఈ కుటుంబానికి చెందినవి. వీటిల్లో విటమిన్ సి, విటమిన్ కె, మాంగనీస్ ఎక్కువగా లభిస్తాయి. వీటిల్లో సల్ఫోరాఫేన్ అనే ఒక రసాయనం ఉంటుంది. దానికి కాన్సర్ పెరుగుదలను నిరోధించే గుణం ఉన్నట్లు బయటపడింది. ఈ సల్ఫోరాఫేన్, సోయాబీన్స్లో ఉండే మరో రసాయనం జెనిస్టీన్ కలిసి బ్రెస్ట్ కాన్సర్ పెరుగుదలను అరికట్టగలవని పరిశోధనల్లో తేలింది.
క్యారట్: వీటిల్లో విటమిన్ కె, విటమిన్ ఎ, యాంటాక్సిడెంట్లు ఉంటాయి. క్యారట్కు ఆ ఆరెంజ్ రంగును ఇచ్చే బీటాకెరొటీన్ రోగనిరోధక వ్యవస్థను పటిష్టపరుస్తుంది. కొన్ని రకాల కాన్సర్లను కూడా ఇది నిరోధించగలదని ఇటీవలి పరిశోధనల్లో తెలిసింది. బ్రెస్ట్, ప్రోస్టేట్ కాన్సర్ల విషయంలో బీటాకెరొటిన్ ప్రభావం అధికంగా ఉన్నట్లు గుర్తించారు.
చేపలు: సాల్మన్, మాకరెల్, యాంఖోవీస్ వంటి కొవ్వు చేపల్లో విటమిన్ బి, పొటాసియం, ఒమేగా 3 కొవ్వులు ఉంటాయి. మంచినీటి చేపలు ఎక్కువగా తీసుకునే వారికి పెద్దపేగుల కాన్సర్ వచ్చే అవకాశం తక్కువని ఒక అధ్యయనంలో బయటపడింది.
ఆక్రోటు (వాల్నట్): అన్ని రకాల నట్స్కూ ఎంతో కొంత కాన్సర్ నిరోధక గుణాలు ఉన్నట్లు పరిశోధనలు తెలుపుతున్నాయి. అయితే ప్రత్యేకించి వాల్నట్లో ఈ గుణాలు ఎక్కువ ఉన్నట్లు ఇటీవల తెలిసింది. వాల్నట్లో ఉండే పెడుంక్యులాజిన్ అనే రసాయనం బ్రెస్ట్ కాన్సర్ను నిరోధించగలదని పరిశోధనల్లో తేలింది.
లెగ్యూమ్ కుటుంబం కాయ ధాన్యాలు: బీన్స్, బఠాణీ, పెసలు అలసందలు, ఉలవల వంటి కాయధాన్యాలు కాన్సర్ వచ్చే ప్రమాదాన్ని గణనీయంగా తగ్గించగలవని తెలిసింది. వీటిల్లో పీచు పదార్ధాలు ఎక్కువ.
Disclaimer: This content and media is created and published online for informational purposes only. It is not intended to be a substitute for professional medical advice and should not be relied on as health or personal advice.