Grapes : సీజన్ లతో సంబంధం లేకుండా అన్ని సీజన్లలో లభించే పండ్లలో ద్రాక్ష పండ్లు ఒకటి అని చెప్పవచ్చు. చూడటానికి ఎంతో చిన్నవిగా ఉన్న ఈ పండ్లు ఎంతో తీయగా, పులుపు రుచిని కలిగి ఉంటాయి. తినడానికి రుచిని మాత్రమే కాకుండా ఎన్నో ఆరోగ్య ప్రయోజనాలను కూడా అందిస్తుంది. మన శరీరానికి కావలసినన్ని పోషక విలువలను ఇవ్వటంలో ద్రాక్ష పండ్లు ముందు వరుసలో ఉంటాయి. ఇందులో ఉన్నటువంటి విటమిన్స్, క్యాల్షియం, ఐరన్, మెగ్నీషియం వంటి పోషకాలు పుష్కలంగా ఉండటం వల్ల అనేక దీర్ఘకాలిక సమస్యల నుంచి విముక్తి పొందడంలో దోహదపడతాయి. అయితే ఈ ద్రాక్ష పండ్లను తినడం వల్ల ఎలాంటి ప్రయోజనాలు కలుగుతాయో ఇక్కడ తెలుసుకుందాం…
ద్రాక్షపండ్లలో పుష్కలంగా లభించేటటువంటి రెస్వెరాట్రాల్ అనే పదార్థం చర్మం, రొమ్ము క్యాన్సర్ లను నివారించడంలో కీలక పాత్ర పోషిస్తుంది.రెస్వెరాట్రాల్ అనేది ఒక యాంటీ ఆక్సిడెంట్. ఇది ఎక్కువగా ఎరుపు రంగు, నీలిరంగు ద్రాక్ష తొక్కలో పుష్కలంగా లభిస్తుంది. చాలామంది ద్రాక్షపండు తొక్క తీసేసి తింటారు. అలా తినడం వల్ల క్యాన్సర్ ను నివారించేటటువంటి యాంటీ ఆక్సిడెంట్లను కోల్పోతాము. ఇందులో ఉన్నటువంటి పాలీఫెనాల్స్, పొటాషియం , యాంటీ ఇన్ఫ్లమేటరీ లక్షణాలు గుండె పని తీరును మెరుగుపరచడంలో ప్రముఖ పాత్ర వహిస్తాయి.
ద్రాక్ష పండ్లలో ఎక్కువ శాతం విటమిన్ ఏ, సి ఉండటం వల్ల మన శరీరానికి కావాల్సినంత రోగనిరోధక శక్తిని అందించడమే కాకుండా కంటి చూపు సమస్యల నుంచి విముక్తి కలిగిస్తుంది. ఇందులో ఉన్నటువంటి క్యాల్షియం, ఐరన్, ఎముకల దృఢత్వానికి దోహదపడతాయి. అదేవిధంగా రక్తహీనత సమస్యతో బాధపడేవారు ఈ పండ్లను తినడం వల్ల ఐరన్ పుష్కలంగా లభిస్తుంది. అంతేకాకుండా ఫైబర్ శాతం అధికంగా ఉండే ద్రాక్ష పండ్లు ప్రతి రోజు తీసుకోవడం వల్ల మలబద్దక సమస్య నుంచి విముక్తి కలిగిస్తుంది. ఇన్ని ఆరోగ్య ప్రయోజనాలు మెండుగా ఉన్న ద్రాక్ష పండ్లను ప్రతిరోజూ తీసుకోవడం వల్ల మంచి ఆరోగ్యం పొందవచ్చని నిపుణులు తెలియజేస్తున్నారు.