Instant Vadda: ఉదయం బ్రేక్ ఫాస్ట్ లో గారే అదేనండి వడ ఇష్టంగా తినడం.. అయితే ఈ వడలను మినప్పప్పుతో చేస్తారు ఇవి తినడానికి రుచిగా ఉన్న చేయడానికి మాత్రం చాలా సమయం పడుతుంది. ముందుగా మినప్పప్పును నానబెట్టుకోవాలి వాటిని శుభ్రంగా కడిగి పిండి వేసుకోవాలి. ఆ తర్వాత నూనెలో వేయించుకోవాలి. ఇప్పుడు మినప్పప్పుతో పని లేకుండా రుచిగా వడలను అదేలా తయారు చేసుకోవాలో చూద్దాం..
రవ్వ వడలు తయారీకి కావాల్సిన పదార్థాలు.. బొంబాయి రవ్వ ఒక కప్పు, సన్నగా తరిగిన పచ్చిమిర్చి రెండు, అల్లం తరుగు ఒక చెంచా, పెరుగు పావు కప్పు, సన్నగా తరిగిన కొత్తిమీర కరివేపాకు కొద్దిగా, జీలకర్ర ఒక చెంచా, ఉప్పు తగినంత, నూనె డీప్ ఫ్రైకి సరిపడా.
రవ్వ వడలు తయారీ విధానం..
ముందుగా ఒక జార్లో రవ్వను తీసుకొని మెత్తని పొడి లాగా చేసుకోవాలి. తరువాత ఒక బాండీలో ఒకటిన్నర కప్పు నీళ్లు పోసి వేడి చేయాలి .అందులోనే తగినంత ఉప్పు వేసి నీళ్లు వేడి అయ్యాక మిక్సీ పట్టుకున్న రవ్వను ఉండలు లేకుండా కలుపుకోవాలి. ఈ రవ్వను దగ్గరపడే వరకు ఉడికించుకోవాలి. అంటే ఉప్మా చేసుకున్నట్టుగా.. ఆ తర్వాత స్టవ్ ఆఫ్ చేసి ఈ మిశ్రమం గోరువెచ్చగా అయ్యాక. అందులో పెరుగు జీలకర్ర, పచ్చిమిర్చి, అల్లం, కొత్తిమీర, కరివేపాకు ఇలా అన్నింటినీ వేసి కలుపుకోవాలి. ముందుగా చేతులకు నూనె రాసుకుని ఈ మిశ్రమాన్ని కొద్ది కొద్దిగా తీసుకొని చిన్న ఉండల లాగా చేసుకోవాలి. వీటిని వడ ఆకారంలో ఒత్తుకోవాలి.
మరో బాండీలో నూనె పోసి బాగా వేడెక్కించాలి. ఇందులో ముందుగా సిద్ధం చేసుకున్న వడలను వేసి దోరగా కాల్చుకోవాలి కాలిన తర్వాత వీటిని ప్లేట్లోకి తీసుకోవాలి. అంతే సింపుల్ గా ఈ రవ్వ వడలు అప్పటికప్పుడు తయారు చేసుకోవచ్చు. వీటిని టమాటా చట్నీ, పల్లి చట్నీ లేదంటే సాంబార్ తో తీసుకుంటే రుచిగా ఉంటాయి.