Rice Idly: మిగిలిన అన్నం పరేయకుండా క్షణాల్లో మెత్తటి ఇడ్లీ చేసేయండీలా..!

Rice Idly: హెల్తీ బ్రేక్ ఫాస్ట్ లో ఇడ్లీ కూడా ఒకటి.. ఆరోగ్యానికి మంచిదనీ తెలిసినా ఈ పిండి సిద్ధం చేసుకోవడానికి కాస్త శ్రమ అవసరం.. కానీ చాలా తక్కువ సమయంలో.. అది కూడా మిగిలిపోయిన అన్నంతో మెత్తటి దూది లాంటి ఇడ్లీ చేసుకోవచ్చు క్షణాల్లో.. అందుకు కావలసిన పదార్థాలు.. తయారీ విధానం గురించి తెలుసుకుందాం..!

మిగిలిన అన్నంతో ఇడ్లీ తయారీ విధానం..!

కావలసిన పదార్థాలు : అన్నం ఒక కప్పు, ఇడ్లీ రవ్వ రెండు కప్పులు, పెరుగు ఒక కప్పు, నీళ్లు తగినన్ని, ఉప్పు తగినంత, వంట సోడా పావు టీ స్పూన్..

ముందుగా ఇడ్లీ రవ్వ ను ఒక గిన్నెలో తీసుకొని తగినన్ని నీళ్లు పోసి అరగంట పాటు నానబెట్టుకోవాలి. ఆ తర్వాత ఇడ్లీ రవ్వ లోని నీళ్లు వంపేసి గట్టిగా పిండుకుని ఇడ్లీ రవ్వ ను మరొక గిన్నెలోకి తీసుకొని పక్కన పెట్టుకోవాలి..

ఇప్పుడు అన్నం పెరుగు రెండింటినీ కలిపి మిక్సీ పట్టుకోవాలి. మధ్య మధ్యలో కొద్దిగా నీళ్ళు పోసి పిండి ప్రిపేర్ చేసుకోవాలి. ఈ పిండిలో ముందుగా సిద్ధం చేసుకుని పెట్టుకున్న ఇడ్లీ రవ్వ వేసి కలపాలి. అందులో ఉప్పు, వంటసోడా వేసి బాగా కలపాలి. ఇలా తయారు చేసుకున్న ఇడ్లీ పిండి ఇడ్లీ ప్లేట్లకు నెయ్యి రాసుకుని పిండి పెట్టీ.. ఇడ్లీ పాత్రలో అర గ్లాసు నీళ్ళు పోసి ఈ ప్లేట్ లో అందులో పెట్టి ఐదు నిమిషాల పాటు ఆవిరిపై ఉడికించాలి. ఆ తరువాత స్టవ్ ఆఫ్ చేసి మూత తీయాలి. దాంతో మెత్తని మృదువైన ఇడ్లీలు తయారు అవుతాయి. అన్నం మిగిలినప్పుడు, ఇడ్లీ పిండి తయారు చేసుకునే సమయం లేనప్పుడు ఇలా అన్నం తో ఇడ్లీ తయారు చేసుకొని తినవచ్చు. ఈ ఇడ్లీలను సాంబార్ , కొబ్బరి పచ్చడి, కరివేపాకు కారం తో కలిపి తింటే చాలా రుచిగా ఉంటాయి. ఈ ఇడ్లీనీ తయారు చేసుకోవడానికి ఎక్కువ సమయం కూడా పట్టదు.