కూరగాయలలో వంకాయ, దొండకాయ, బెండకాయ, టొమోటో వంటి కూరగాయలను నీళ్లతో శుభ్రంగా కడిగి వండేసుకుంటూ ఉంటాము. కానీ సొరకాయ, బీరకాయ,దోసకాయ లాంటి కూరగాయలకు పైన చెక్కు తీసి ముక్కలు కోసి కూరలు వండుకుంటాము. అలా తీసేసిన కూరగాయల చెక్కులను పారయడమో లేక మొక్కలకు సహజ ఎరువుగా ఉపయోగిస్తూ ఉంటారు. నిజానికి పనికిరాదు అని మనం బయట పారేసే ఆ కూరగాయల తొక్కలోనే చాలా రకాల పోషక విలువలు దాగి ఉన్నాయి. అందుకే వీటిని వంటలోనూ, సౌందర్య సాధనాలుగానూ ఉపయోగిస్తున్నారు కొందరు. అదెలా అని అనుకుంటున్నారా. అయితే ఒకసారి ఇది చదవండి.
కూరగాయలు తింటే క్యాన్సర్ రాదా..!?
కూరగాయల తొక్కలతో పచ్చడి :
సొర, బీర, దోస కాయల చెక్కులను తీసేసిన తరువాత వాటిని నూనెలో వేయించి పక్కన పెట్టుకోవాలి. ఆ తరువాత పచ్చిమిరపకాయలు, పల్లీలు కూడా వేసి వేపుకోవాలి. ఇప్పుడు ముందుగా వేపేకున్న కూరగాయల తొక్కలు, ఉప్పు, పచ్చిమిర్చి, చింత పండుగుజ్జు, పల్లీలు అన్నిటిని ఒక మిక్సీ జార్ లో వేసి పచ్చడిలా చేస్తే చాలా బాగుంటుంది. ఈ పచ్చడి తినడానికి ఎంతో రుచికరంగా ఉండడంతో పాటు ఆరోగ్యానికి కూడా చాలా మంచిది
కూరగాయల తొక్కల వడియాలు :
అలాగే కూరగాయల తొక్కులను చిన్న చిన్న ముక్కలుగా కోసుకుని వాటిలో తగినంత ఉప్పు, పసుపు, కొద్దిగా అల్లం, మిరియాల పొడి వేసి గ్రైండ్ చేసి చిన్న ఉండల్లా చేసుకుని ఎండలో ఎండబెట్టి నిలవచేసుకోవాలి. ఇలా నిలవ చేసుకున్న ఉండలతో కూర చేసుకోవచ్చు లేదంటే పప్పుచారులో వేసుకుంటే చాలా రుచికరంగా ఉంటాయి. ఎండాకాలంలో మనం ఎక్కువగా పుచ్చకాయలను తింటూ ఉంటాము కదా.. పూచ్చకాయలోని ఎర్రటి భాగాన్ని తిని మిగిలిన తొక్కు బాగాన్ని అంతా పడేస్తుంటాం. దానితో రోటి పచ్చడి లేదా జామ్ చేసుకోవచ్చు. ఇంకా కూరగాయల చెక్కును కుక్కర్లో మెత్తగా ఉడికించి సూప్ లా చేసుకోవచ్చు.లేదంటే కూరగాయల తొక్కలను మెత్తగా రుబ్బి, బియ్యప్పిండిలో కలిపి వడియాలు కూడా పెట్టొచ్చు.చాలా మంది మామిడిపండు చెక్కు తీసి ముక్కలు కోసుకుని తింటూ ఉంటారు.నిజానికి మామిడి పండు యొక్క పై చెక్కుతో సహా తింటేనే శరీరానికి. కావలిసిన పోషకాలు,పీచుపదార్థం అందుతాయి.
కూరగాయల తొక్కలతో పేస్ ప్యాక్ :
అలాగే బంగాళాదుంప చెక్కును మెత్తగా నూరి ప్యాక్లా వేసి పావుగంట తర్వాత కడిగేస్తే ముఖం కాంతివంతంగా ఉంటుంది.అరటిపండు తొక్కను మాస్క్గా వేయడం వల్ల ముఖానికి మెరుపు వస్తుంది. కానీ కూరగాయల తొక్కలను ఉపయోగించేటపుడు ఉప్పునీళ్లతో శుభ్రంగా కడిగి మాత్రమే ఉపయోగించాలి.