ఒక స్త్రీ విద్యావంతురాలైతే ఆ కుటుంబం విద్యావంతమవుతుందని అంటారు. అలాగే ఒక స్త్రీ ఆరోగ్యంగా ఉంటే సమాజం ఆరోగ్యవంతం గా ఉంటుంది అంటారు. ఎందుకంటే స్త్రీ లు కుటుంబ బాధ్యతలతోపాటు ఉద్యోగ బాధ్యతలు మోస్తున్నారు. పిల్లల ఆలనా పాలన, చదువులు, భర్త, అత్తామామల ఆలనాపాలనలు, సమయానికి అన్నీ సమకూర్చాలి, ఇంకోపక్క ఉద్యోగ బాధ్యతలు, ఇవన్నీ చాలా మంది స్త్రీ ల జీవితాలలో భాగాలే!
వీటిలో ఏ ఒక్కదాన్లో లోటు లేకుండా చక్కబెట్టుకోవాలి. ఈ పనులు చేయడం లో అవసరమైతే పరుగులెత్తాలి. పనుల్లో వేగం పెంచవలిసి ఉంటుంది. ఆ విధం గా ఇంట్లో, ఇటు ఆఫీసుల్లోని పనులు ఎంతో సమర్ధవంతం గా నిర్వహిస్తుంటారు. అలాంటి వారు భవిష్యత్‌ లో ఎన్నో శారీరక, మానసిక, సమస్యలు ఎదుర్కోవలిసి వస్తుందని అధ్యయనాలు దృవీకరిస్తున్నాయి. వారంలో 55 కంటే ఎక్కువ గంటలు పనిచేసే స్త్రీలు నిరాశ, కుంగుబాటు, ఆందోళన చెందడం వంటి మానసిక పరమైన సమస్యలను ఎదుర్కొంటారని తాజా అధ్యయానాలు తేల్చి చెప్తున్నాయి.
బ్రిట్‌లోని క్వీన్ మేరీ యూనివర్సిటీకి చెందిన శాస్త్రవేత్తలు దీని పై పరిశోధన జరిపారు. 20వేల మంది పై జరిగిన ఈ పరిశోధన లో ఆసక్తికర నిజాలు తెలిసాయి. 35 నుంచి 40 గంటలు పనిచేస్తున్న మహిళలతో పోలిస్తే అంతకన్న ఎక్కువ గంటలు పనిచేసిన వారికి మానసిక పరమయిన సమస్యలు ఎక్కువగా ఉంటాయని తెలిసింది. ఈ సమస్యలు మితిమీరితే శారీరక సమస్యలుగా మారి గుండెసమస్యలకు కారణమవుతాయని చెబుతున్నారు. ముఖ్యంగా సెలవులు కూడా లేకుండా పనిచేసే వారిలో ఈ ప్రమాదం చాలఎక్కువగా ఉంటుందని, ఇది మగవారికికూడా వర్తిస్తుందని చెబుతున్నారు. జీవితం లోఎదుగుదల ముఖ్యమే. కానీ, ఆరోగ్యంగా ఉంటేనే ఎదగడం సాధ్యమని గుర్తుంచుకోవాలి.
