Imran Khan: పాకిస్థాన్ లో ఇమ్రాన్ సర్కార్ కుప్పకూలింది. ప్రతిపక్షాలు ప్రవేశపెట్టిన అవిశ్వాసం తీర్మానం నెగ్గడంతో ఇమ్రాన్ ఖాన్ పదవిని కోల్పోయారు. పాకిస్థాన్ చరిత్రలో అవిశ్వాస తీర్మానం ద్వారా పదవి కోల్పోయిన తొలి ప్రధానిగా ఇమ్రాన్ ఖాన్ రికార్డుకు ఎక్కారు. శనివారం పాక్ జాతీయ అసెంబ్లీలో అనేక నాటకీయ పరిణామాలు చోటుచేసుకున్నాయి. పాక్ సుప్రీం కోర్టు ఆదేశాల మేరకు అవిశ్వాస తీర్మానంపై ఓటింగ్ నిర్వహించేందుకు శనివారం ఉదయం 10.30 గంటలకు జాతీయ అసెంబ్లీ సమావేశమైంది. అధికార పక్ష సభ్యుల ఆందోళన నేపథ్యంలో సభ మధ్యాహ్నం 12.30 గంటల వరకు వాయిదా పడింది. అనంతరం 3 గంటల వరకు ఒక సారి, రాత్రి 8 గంటల వరకు మరో సారి వాయిదా పడింది.
Imran Khan: ఆదివారం తెల్లవారుజామున ఓటింగ్
ఆ తర్వాత సమావేశమైనా మరో రెండు సార్లు వాయిదా పడింది. ఆ తరువాత ఆదివారం తెల్లవారుజామున ఓటింగ్ జరిగింది. ఓటింగ్ జరిగే సమయంలో ఇమ్రాన్ ఖాన్ సభలో లేరు. ఇమ్రాన్ పార్టీ తెహ్రీకే ఇన్సాఫ్ సభ్యులు సభ నుండి వాకౌట్ చేయగా, ఆయనపై తిరుగుబాటు బావుటా ఎగురవేసిన సొంత పార్టీ సభ్యులు మాత్రం ప్రభుత్వ స్థానంలోనే ఉన్నారు. అవిశ్వాస తీర్మానంపై ఓటింగ్ జరిగితే పదవి కోల్పోవడం ఖాయం కావడంతో ఇమ్రాన్ ఖాన్ ముందుగానే తన అధికార నివాసం నుండి ఖాళీ చేసి వెళ్లిపోయారు.
ఇమ్రాన్ సర్కార్ కు వ్యతిరేకంగా 174 ఓట్లు
మొత్తం 342 మంది సభ్యులు ఉన్న పాక్ జాతీయ అసెంబ్లీలో మెజార్టీకి అవసరమైన బలం 172. అయితే ఇమ్రాన్ సర్కార్ కు వ్యతిరేకంగా 174 ఓట్లు వచ్చినట్లు జాతీయ అసెంబ్లీ స్పీకర్ అయాజ్ సాదిఖ్ ప్రకటించారు. ఇమ్రాన్ ప్రభుత్వం కూలిపోయిన నేపథ్యంలో తదుపరి ప్రధానిగా విపక్షాల ఉమ్మడి అభ్యర్ధి, పాకిస్థాన్ ముస్లిం లీగ్ – నవాజ్ పార్టీ అభ్యర్ధి షెహబాజ్ షరీఫ్ తదుపరి ప్రధాని అయ్యే అవకాశం ఉంది. కొత్త ప్రధానిని ఎన్నుకునేందుకు పాక్ జాతీయ అసెంబ్లీ ఈ రోజు మధ్యాహ్నం 2 గంటలకు భేటీ కానుంది.
