Breaking: మహారాష్ట్రలో ఓ పక్క రాజకీయ ప్రతిష్టంభన కొనసాగుతోంది. ఏక్ నాథ్ శిందే తిరుగుబాటుతో ఉద్దవ్ ఠాక్రే సర్కార్ మైనార్టీలో పడింది. శిందే నేతృత్వంలో 50 మందికిపైగా ఎమ్మెల్యేలు గువాహటిలోని ఓ స్టార్ హోటల్ లో ఉన్న సంగతి తెలిసిందే. రెబల్ ఎమ్మెల్యేలపై శివసేన ఎంపీ సంజయ్ రౌత్ సీరియస్ కామెంట్స్ చేస్తున్నారు. ఈ తరుణంలో ఎంపీ సంజయ్ రౌత్ కు ఎన్ ఫోర్స్ మెంట్ డైరెక్టరేట్ (ఈడీ) జారీ చేసింది. ముంబాయిలోని ఈడీ కార్యాలయంలో విచారణకు హజరు కాావాలని కోరింది.
భూకుంభకోణం కేసులో సంజయ్ రౌత్ కు ఈడీ నోటీసులు జారీ చేసింది. శివసేనలో కీలక నేతగా ఉన్న సంజయ్ రౌత్.. శివసేన అధికార పత్రిక సామ్నా బాధ్యతలు కూడా నిర్వహిస్తున్నారు. రాష్ట్రంలో రాజకీయ సంక్షోభం నడుస్తున్న వేళ సంజయ్ రౌత్ కు ఈడీ సమన్లు జారీ చేయడం హాట్ టాపిక్ అయ్యింది. ఓ పక్క తిరుగుబాటు నేత ఏక్ నాథ్ శిందే వెనుక బీజేపీ ఉందన్న ఆరోపణలు వినబడుతున్న వేళ శివసేన కీలక నేత సంజయ్ రౌత్ కు ఈడీ నోటీసులు జారీ చేయడం గమనార్హం.
రాజకీయ వేధింపుల్లో భాగంగానే కేంద్రంలోని బీజేపీ రౌత్ ను టార్గెట్ చేసి ఈడీతో నోటీసులు జారీ చేయించిందని శివసేన నేతలు ఆరోపిస్తున్నారు. మరో పక్క అసమ్మతి ఎమ్మెల్యేలకు నేతృత్వం వహిస్తున్న ఏక్ నాథ్ శిందేకి రోజురోజుకు బలం పెరుగుతోంది. మరో మంత్రి ఉదయ్ సామంత్ నేడు శిందే శిబిరానికి చేరుకుని మద్దతు తెలియజేశారు. దీంతో శిందే క్యాంపులో చేరిన మంత్రుల సంఖ్య తొమ్మిదికి చేరింది.
