రక్షణ, అయుష్ శాఖ సహాయ మంత్రి శ్రీపాదనాయక్ రోడ్డు ప్రమాదానికి గురైయ్యారు. ప్రమాదంలో ఆయన తీవ్ర గాయాలతో బయటపడగా కేంద్ర మంత్రి భార్య విజయ, వ్యక్తిగత కార్యదర్శి (పిఎ) దీపక్ మృతి చెందారు.
శ్రీపాద నాయక్ ప్రయాణిస్తున్న కారు కర్నాటక లోని ఉత్తర కన్నడ జిల్లా అంకుల సమీపంలో అదుపుతప్పి బోల్తా పడింది. మంత్రి ఎల్లపూర్ నుండి గోకర్ల వెళుతుండగా ఈ ప్రమాదం చోటుచేసుకుంది. వెంటనే స్థానికులు తీవ్రంగా గాయపడిన నాయక్ దంపతులను, పి ఎ దీపక్ ను సమీపంలోని ఆసుపత్రికి తరలించారు. ఆసుపత్రికి వెళ్లే సరికి శ్రీపాద నాయక్ సతీమణి విజయ, పిఏ దీపక్ లు మృతి చెందారు. విషయం తెలిసిన వెంటనే పోలీసులు ఘటనా స్థలానికి చేరుకుని కేసు నమోదు చేసి దర్యాప్తు చేస్తున్నారు. తీవ్రంగా గాయపడిన కేంద్ర మంత్రి శ్రీపాద నాయక్‌కు మెరుగైన వైద్యం కోసం గోవాలోని బంబోలి ఆసుపత్రి కి తరలించారు. ఘటనపై ప్రధాన మంత్రి మోడీ, రక్షణ శాఖ మంత్రి రాజ్ నాధ్ సింగ్ లు వెంటనే స్పందించి గోవా ముఖ్యమంత్రి ప్రమోద్ సావంత్‌కు ఫోన్ చేసి శ్రీపాద నాయక్ కు మెరుగైన వైద్యం అందేలా చూడాలని కోరారు. అవసరమైతే ప్రత్యేక విమానంలో ఢిల్లీకి తరలించాలని రాజ్ నాధ్ సింగ్ సూచించారు. సీఎం సావంత్ వెంటనే ఆసుపత్రికి చేరుకుని శ్రీపాద నాయక్ ఆరోగ్య పరిస్థితి గురించి వైద్యులను అడిగి తెలుసుకున్నారు.
ఇది కూడా చదవండి..ప్రజా ప్రతినిధులకు పిఎం మోడి షాక్.. టీకాకు పోటీపడవద్దని సూచన
