Cocktail Medicine: రెండు రకాల మిశ్రమాన్ని కలిపితే కాక్ టైల్ అంటారు. సాదారణంగా మందు ప్రియులకు కాక్ టైల్ అంటే బాగా తెలుస్తుంది. బార్ షాపులలో మందు బాబులు కిక్ కోసం రెండు మూడు రకాల మందు కలిపి సేవిస్తుంటారు. ఎందుకంటే కాక్ టైల్ ‘కిక్’ యే వేరబ్బా అంటుంటారు. ఇప్పుడు కరోనా వేళ ‘కాక్ టైల్’ ప్రయోగాలు సత్ఫలితాలు ఇస్తున్నాయి.
ట్రంప్ వాడిందీ కాక్ టైల్ ఇంజక్షన్
కరోనాకు మందు లేదు అనుకుంటున్న సమయంలో రోగుల పాలిట సంజీవనిగా వచ్చింది మోనోక్లోనల్ యాంటీ బాజీ కాక్ టైల్ డ్రగ్. గత అమెరికా అధ్యక్షుడు డోనాల్డ్ ట్రంప్ కి కరోనా సోకిన సమయంలో అక్కడి మిలటరీ ఆసుపత్రిలో ఆయనకు ఈ ఇంజక్షన్ వినియోగించగా రెండు రోజుల్లో వైరస్ నుండి విముక్తి పొందారు. కాసిరివిమోబ్, ఇమ్డెవిమాబ్ అనే రెండు రకాల డ్రగ్ మిశ్రమంతో ఈ యాంటీ బాడీ కాక్ టైల్ ఇంజక్షన్ తీసుకువచ్చారు. ఈ మిశ్రమ డ్రగ్ ఇటీవల భారతదేశంలోనూ అందుబాటులోకి వచ్చింది. మంచి ఫలితాలు ఇస్తోంది.
Cocktail Medicine: ఇక వ్యాక్సిన్ విషయానికి వస్తే…
కోవిషీల్డ్, ఫైజర్ వ్యాక్సిన్ మిశ్రమ డోసులు కరోనా నివారణలో ఎక్కువ ప్రభావవంతంగా పని చేస్తాయని బ్రిటన్ లోని ఆక్స్ ఫర్డ్ విశ్వ విద్యాలయం పరిశోధకులు తాజా అధ్యయనంలో తేల్చారు. ఈ రెండింటిలో ఒక టీకా ను తొలి డోసుగా, మరో దాన్ని రెండో టీకా డోసుగా స్వీకరించినప్పుడు వ్యక్తులకు బలమైన రోగ నిరోధక సామర్థ్యం చేకూరుతుందని నిర్ధారించారు. 830 మంది వ్యక్తులపై పరిశోధకులు అధ్యయనం చేయగా కోవిడ్ కారక సార్స్ – కోవ్ -2 వైరస్ లోని స్పైక్ ప్రొటీన్ కు వ్యతిరేకంగా ఎక్కువ యాంటీ బాడీలు ఉత్పన్నవుతున్నాయని గుర్తించారు. అయితే మొదట ఫైజర్ టీకాను తరువాత కోవిషీల్డ్ టీకాను వేసుకున్నవారికంటే తొలుత కోవిషీల్డ్, ఆ తరువాత ఫైజర్ వ్యాక్సిన్ తీసుకున్న వారిలో యాంటీ బాడీలు, ట సెల్ స్పందనలు మరింత అధికంగా ఉంటున్నాయని తెలిపారు.
