Punjab:అమృత్ సర్ స్వర్ణ దేవాలయం (గురు రామ్ దాస్ నివాస్) సమీపంలో ఈ తెల్లవారుజామున భారీ పేలుడు సంభవించింది. ఈ ఘటనకు సంబంధించి అయిదుగురు వ్యక్తులను పోలీసులు అదుపులోకి తీసుకున్నారు. కాగా స్వర్ణ దేవాలయం సమీపంలో పేలుళ్లు జరగడం వారం రోజుల్లో ఇది మూడో సారి. గత అర్ధరాత్రి దాటిన తర్వాత 12.30 గంటలకు పేలుడు సంభవించినట్లుగా తెలుస్తొంది. పేలుడు ఘటనకు సంబంధించి అయిదుగురిని అరెస్టు చేసి కేసును ఛేదించినట్లు పంజాబ్ డీజీపీ గౌరవ్ యాదవ్ ట్విట్టర్ వేదికగా పేర్కొన్నారు. ఆ ప్రాంతంలో శాంతి భద్రతలను విఘాతం కల్గించడమే ఈ పేలుడుల వెనుక ఉద్దేశమని పోలీసులు అనుమానిస్తున్నారు.
తాజా పేలుడు సమయంలో అక్కడ సమీపంలోని ఓ గదిలో ఉన్న ఇద్దరు పురుషులు, ఒక మహిళను పోలీసులు అదుపులోకి తీసుకుని ప్రశ్నిస్తున్నారు. పేలుడు కోసం పొటాషియం క్లోరేట్ ను ఉపయోగించినట్లుగా పోలీసులు తెలిపారు. అనుమానితులను అదుపులోకి తీసుకున్నామని, దర్యాప్తు జరుపుతున్నట్లు పోలీస్ కమిషనర్ నౌనిహాల్ సింగ్ తెలిపారు. ఈ నెల 6, 8న కూడా స్వర్ణ దేవాలయం వీధిలో పేలుళ్లు సంభవించాయి. వరుస పేలుళ్లతో స్థానికుల్లో భయాందోళనలు వ్యక్తం చేస్తున్నారు. ఈ పేలుళ్లప విచారణ కోసం పంజాబ్ పోలీసులు జాతీయ దర్యాప్తు సంస్థల సాయం తీసుకున్నాయి.
జాతీయ దర్యాప్తు సంస్థ (ఎన్ఐఏ) ఇటీవల రెండో సారి జరిగిన పేలుడు ప్రాంతాన్ని సందర్శించింది. తాజా ఘటనపై పోలీసులు, ఫోరెన్సిక్ బృందం అక్కడికి చేరుకుని విచారణ జరుపుతున్నారు. తొలి పేలుడు సమయంలో ఓ వ్యక్తి గాయపడగా, సమీప భవనాల్లోని అద్దాలు పగిలిపోయాయి. మే 8న సంభవించిన రెండో పేలుడు తీవ్రత కొంత తక్కువే అయినా మరో వ్యక్తి గాయపడ్డాడు. పేలుళ్లకు ఉపయోగించిన ట్రిగ్ర్ కానీ, ఎలాంటి పరికరం గానీ ఆ ప్రాంతంలో పోలీసులకు ఇప్పటి వరకూ లభ్యం కాలేదు. అయితే ఈ ఘటనల్లో ఎలాంటి ప్రాణ నష్టం జరగకపోవడంతో అందరూ ఊపిరిపీల్చుకున్నారు.
కర్ణాటక ఎగ్జిట్ పోల్స్ ..కుమార స్వామి సీఎంగా హ్యాట్రిక్ కొడతారా..?
