జర్నలిస్ట్ మహమ్మద్ జుబైర్ కు బిగ్ రిలీఫ్ ఇచ్చిన సుప్రీం కోర్టు

ప్రముఖ జర్నలిస్ట్, ఆల్ట్ న్యూస్ సహ వ్యవస్థాపకుడు మహమ్మద్ జుబైర్ కు సుప్రీం కోర్టు బిగ్ రిలీఫ్ ఇచ్చింది. జుబైర్ పై ఉత్తరప్రదేశ్ లో నమోదు అయిన ఆరు కేసుల్లోనూ బెయిల్ మంజూరు చేస్తూ జస్టిస్ డీవై చంద్రచూడ్ నేతృత్వంలోని ధర్మాసం ఆదేశాలు జారీ చేసింది. రూ.20వేల బెయిల్ బాండును పూచికత్తుగా సమర్పించాలని జుబైర్ ను ఆదేశించింది. ఈ రోజు సాయంత్రం 6 గంటల లోపు పూచికత్తు ప్రక్రియ పూర్తి చేసుకుని విడుదల చేయాలని తీహార్ జైలు అధికారులను ఆదేశించింది.

ఇదే క్రమంలో యూపీలో నమోదైన కేసులన్నింటినీ ఢిల్లీ పోలీసు విభాగానికి బదిలీ చేస్తూ సుప్రీం కోర్టు ఆదేశాలు జారీ చేసింది. జుబైర్ ట్వీట్లపై దర్యాప్తునకు ఉత్తరప్రదేశ్ ప్రభుత్వం ఏర్పాటు చేసిన సిట్ ను రద్దు చేసింది. ఈ వ్యవహారానికి సంబంధించి జుబైర్ పై ప్రస్తుతం నమోదైన కేసులతో పాటు భవిష్యత్తులో నమోదయ్యే ఎఫ్ఐఆర్ లు సైతం ఢిల్లీకి బదిలీ అవుతాయని స్పష్టం చేసింది. తనపై నమోదైన ఎఫ్ఐఆర్ లను రద్దు చేయాలని కోరుతూ జుబైర్ ఢిల్లీ హైకోర్టును ఆశ్రయించవచ్చని సుప్రీం కోర్టు తెలిపింది.

ఒక వర్గం మనోభావాలను దెబ్బతీసే విధంగా 2018లో ట్వీట్ చేశారన్న అబియోగంపై నమోదు అయిన కేసులో ఆయనను ఢిల్లీ పోలీసులు గత నెల 27వ తేదీన అదుపులోకి తీసుకున్నారు. అయిదు రోజుల పోలీసు కస్టడీ విచారణ అనంతరం ఈ నెల2వ తేదీన ఢిల్లీ కోర్టులో పోలీసులు హజరుపర్చారు. ఈ సమయంలో జుబైర్ బెయిల్ పిటిషన్ దాఖలు చేసిన సమయంలో ఢిల్లీ పోలీసులు ఆయనపై నేరపూరిత కుట్ర, ఆధారాల చెరిపివేత సహా విదేశీ విరాళాల చట్ట ప్రకారం మరిన్ని సెక్షన్లు చేర్చినట్లు కోర్టుకు వివరించారు. దీంతో ఢిల్లీలోని పటియాలా హౌస్ కోర్టు బెయిల పిటిషన్ ను కొట్టివేసి 14 రోజులు రిమాండ్ విధించింది.

ఈ కేసులో మరో మారు ఢిల్లీ కోర్టులో బెయిల్ పిటిషన్ దాఖలు చేయగా గత శుక్రవారం విచారణ జరిపిన కోర్టు.. బెయిల్ మంజూరు చేసింది. రూ.50వేల పూచికత్తు సమర్పించాలని ఆదేశించింది. ఇదే క్రమంలో జుబైర్ కోర్టు అనుమతి లేకుండా దేశం విడిచి వెళ్లరాదని స్పష్టం చేసింది ఢిల్లీ కోర్టు. కాగా జుబైర్ పై  యుపీలో నమోదు అయిన ఆరు కేసుల్లో ఈ రోజు సుప్రీం కోర్టు బెయిల్ మంజూరు చేసింది.