Vietnam: కరోనా మహమ్మారి ప్రపంచాన్ని ఇప్పుడిప్పుడే వదిలేలా కనబడటం లేదు. ఇప్పటికే పలు రకాల కరోనా వేరియంట్స్ తో అన్ని దేశాలు ఇబ్బందులు పడుతున్న సంగతి తెలిసిందే. ప్రస్తుతం కరోనా సెకండ్ వేవ్ విజృంభిస్తుండగా థర్డ్ వేవ్ ఉందంటూ శాస్త్రవేత్తలు హెచ్చరిస్తున్నారు. మరో పక్క వియత్నాంలో ఇప్పటికే అత్యంత వేగవంతంగా విస్తరించే సంకర జాతి కరోనా వైరస్ వెలుగులోకి రావడం తీవ్ర ఆందోళన కల్గిస్తోంది. కొత్త రకం వేరియంట్ (హైబ్రిడ్ రకం) వెలుగుచూసింది. గత వేరియంట్స్ లను మించి ప్రమాదకరంగా ఈ వైరస్ విస్తరిస్తున్నట్లు అంతర్జాతీయ మీడియా కథనాలు తెలియజేస్తున్నాయి.
వియత్నాం దేశంలో కరోనా సెకండ్ వేవ్ తీవ్ర స్థాయిలో విజృంభిస్తోంది. దేశంలో ఉన్న 63 నగరాలు కరోనా కేసులతో అల్లాడిపోతున్నాయి. దేశంలో నమోదు అవుతున్న కేసుల్లో సగం కేసులు 31 నగరాల నుంచే వస్తున్నాయ. ఆ దేశంలో కరోనా బారిన పడిన రోగులకు నుండి శాంపిల్స్ పరిక్షించగా షాకింగ్ నిజాలు వెల్లడైయ్యాయి. ఇండియా, బ్రిటెన్ లలో వెలుగుచూసిన కరోనా వేరియంట్ లక్షణాలతో కొత్త హైబ్రిడ్ (సంకరజాతి) వేరియంట్ పుట్టుకొచ్చినట్లు శాస్త్రవేత్తలు గుర్తించారు. ఈ విషయాన్ని వియత్నాం ఆరోగ్య మంత్రి న్యూయెస్ థాన్ దృవీకరించారు.
ఈ వైరస్ గత మ్యూటెంట్లను మించిన వేగంతో వ్యాపిస్తొందనీ, గాలి ద్వారా ఒకరి నుండి ఒకరికి సోకే లక్షణం ఈ హైబ్రిడ్ రకానికి ఉందని శాస్త్రవేత్తలు చెబుతున్నారు. పాత వేరియంట్ల కంటే ఇది ప్రాణాలకు ఎక్కువ ముప్పు తెస్తోందని శాస్త్రవేత్తలు ఆందోళన వ్యక్తం చేస్తున్నారు. ఈ హైబ్రిడ్ వేరియంట్ కు సంబంధించిన సమాచారం త్వరలో డబ్ల్యు హెచ్ ఒ కు తెలియజేస్తామని వియత్నాం పేర్కొంటోంది.
వియత్నాంలో ఇప్పటికే ఏడు రకాల వేరియంట్లను గుర్తించారు. గతంలో కరోనా వేరియంట్ల వ్యాప్తిని వియత్నాం ప్రభుత్వం కట్టడి నిలువరించింది. కానీ హైబ్రిడ్ రకం మ్యూటెంట్ వ్యాప్తి నిరోధించడం కష్టంగా మారుతోంది. ఆ దేశంలో ఇప్పటికే 6,396 మందికి కరోనా పాజిటివ్ నిర్ధారణ కాగా 47 మంది మృతి చెందారు. దేశంలో రోజురోజుకు హైబ్రిడ్ రకం ప్రమాదరంగా విస్తరిస్తుండటంతో ఆ దేశ ప్రజలు తీవ్ర ఆందోళన చెందుతున్నారు.
