మనిషి శరీరంలో ఆక్సిజన్ కొరత ను కనిపెట్టడానికి ‘పల్స్ ఆక్సీమీటర్’ సహాయం తో తెలుసుకోవచ్చు . ఆక్సీమీటర్ మన చేతి వేలికి పెట్టుకుంటే చాలు అది మన శరీరంలో ఆక్సిజన్ ఎంత శాతం ఉందో తెలియచేస్తుంది . శరీరంలో 94 శాతం కంటే తక్కువ ఆక్సిజన్ ఉంటే మాత్రం వెంటనే డాక్టర్ దగ్గరకి వెళ్ళిపోవాలి . ముఖ్యంగా కోవిడ్-19 లక్షణాలు ఉన్నవారు మాత్రం రోజులో 3 నుంచి 4 సార్లు ఆక్సిమీటర్ ద్వారా చెక్ చేసుకుంటూ ఉండాలి .
ఆక్సిజన్ 94 కంటే తగ్గిపోతూ కనిపిస్తే మాత్రం మీకు ఆక్సిజన్ అవసరం పడుతుంది అని అర్ధం . సమయానికి మీరు ఆక్సిజన్ అందుకో గలిగితే ఎలాంటి ప్రమాదం ఉండదు. ఊపిరి తీసుకోవడం చాలా కష్టంగా ఉండటం, ఛాతి నొప్పి, తలనొప్పి,గందరగోళం, గుండె వేగంగా కొట్టుకోవడం వంటి లక్షణాలను బట్టి శరీరంలో ఆక్సిజన్ తగ్గుతుందని గమనించాలి. ప్రస్తుతం ఉన్న పరిస్థితులలో మనిషికి ఆక్సిజన్ సరిగా అందకపోతే ఏం చేయాలి అని అందరూ ఆందోళన చెందుతున్నారు.
ప్రోనింగ్ అంటే ఒక వ్యాయామం.ఈ వ్యాయామంతో ఈ సమస్యకు పరిష్కారం పొందవచ్చని వైద్య నిపుణులు తెలియచేస్తున్నారు. అత్యవసర సమయంలో ప్రోనింగ్ చేయడం వలన శరీరంలోకి వెళ్లే ఆక్సిజన్ స్థాయిని మరింత పెంచవచ్చనిసలహా ఇస్తున్నారు . అసలు ప్రోనింగ్ అంటే ఏంటి, ఎలా చేయాలి, ఈ సమయంలో ఎలాంటి జాగ్రత్తలు తీసుకోవాలో లాంటి విషయాలు తెలుసుకుందాం.
ఛాతి, పొట్ట భాగంలో బరువు పడే విధంగా బోర్లా తిరిగి పడుకోవడం వలన , లేదంటే ఒక పక్కకు పడుకొని శ్వాస తీసుకోవడం వల్ల ఊపిరితిత్తులకు అవసరమైన స్థాయిలో ఆక్సిజన్ అందుతుంది. ఈ పద్దతిని ప్రోనింగ్ అని అంటారు. ఐసోలేషన్లో ఉంటున్న కరోనా పేషంట్స్ కి ఈ ‘ప్రోనింగ్’ పద్దతి చాలా ఉపయోగపడుతుంది అని వైద్యులు తెలియచేస్తున్నారు.