బాలీవుడ్లో ఒకప్పుడు వచ్చిన వీర్-జారా సినిమా గుర్తుంది కదా. అందులో నటుడు షారుఖ్ ఖాన్ భారత పైలట్ వీర్ ప్రతాప్ సింగ్గా నటించగా, నటి ప్రీతి జింటా పాకిస్థాన్కు చెందిన యువతి జారా హయత్ ఖాన్గా నటించింది. ఇద్దరూ ప్రేమించుకుంటారు. కానీ అనుకోని కారణాల వల్ల దూరమవుతారు. అయితే సరిగ్గా ఆ మూవీని ప్రేరణగా తీసుకున్నాడో ఏమో తెలియదు కానీ.. ఆ యువకుడు కూడా తాను ప్రేమించిన పాక్ యువతి కోసం ఏకంగా గూగుల్ మ్యాప్స్ ఉపయోగించి భారత సరిహద్దు దాటేందుకు యత్నించాడు. కానీ బార్డర్ సెక్యూరిటీ ఫోర్స్ (బీఎస్ఎఫ్)కు చిక్కాడు. ఇంతకీ అసలు ఏం జరిగిందంటే…
మహారాష్ట్రలోని ఒస్మానాబాద్ ప్రాంతం ఖవాజా నగర్లో నివాసం ఉండే 20 ఏళ్ల సిద్దిక్ మహమ్మద్ జిషాన్ అనే యువకుడు పాకిస్థాన్లోని కరాచీలో ఉన్న షా ఫైసల్ టౌన్లో నివాసం ఉండే సమ్రా అనే యువతిని ప్రేమించాడు. ఇద్దరూ ప్రేమించుకున్నారు. నిత్యం ఫేస్బుక్, వాట్సాప్లలో ఇద్దరూ టచ్లో ఉండేవారు. అయితే జిషాన్ తాను ప్రేమించిన యువతిని ఎలాగైనా కలవాలనుకున్నాడు. అనుకున్నదే తడవుగా గూగుల్ మ్యాప్స్ సహాయంతో పాకిస్థాన్ బార్డర్ దాటేందుకు యత్నించాడు. గుజరాత్లోని రాణ్ ఆఫ్ కచ్ గుండా పాకిస్థాన్లోకి వెళ్లేందుకు యత్నించాడు. అందుకు గాను ఓ వాహనంలో అక్కడికి వెళ్లాడు.
అయితే జిషాన్ ఇంటి నుంచి చెప్పకుండా వెళ్లడంతో.. తల్లిదండ్రులు అతను పారిపోయాడనుకుని పోలీసులకు ఫిర్యాదు చేశారు. పోలీసులు విషయం తెలుసుకుని గుజరాత్ పోలీసులకు సమాచారం ఇచ్చారు. తరువాతే అదే సమాచారాన్ని బీఎస్ఎఫ్కు చేరవేశారు. ఈ క్రమంలో జూలై 16వ తేదీన భారత్, పాక్ సరిహద్దు ప్రాంతం వద్ద.. అంటే పాక్ సరిహద్దుకు సుమారుగా 1.5 కిలోమీటర్ల దూరంలో పాక్లోకి వెళ్లేందుకు యత్నిస్తున్న జిషాన్ను బీఎస్ఎఫ్ వారు అదుపులోకి తీసుకున్నారు. అతని నుంచి వివరాలను సేకరించే పనిలో పడ్డారు. కానీ అతను మాత్రం తన గర్ల్ ఫ్రెండ్ను చూసేందుకే పాక్కు వెళ్లాలని అనుకున్నానని చెబుతున్నాడు. అయితే అతను చెబుతున్నది నిజమా, కాదా అని బీఎస్ఎఫ్ వారు నిర్దారించే పనిలో పడ్డారు.