కరోనా నేపథ్యంలో ఇప్పుడు అన్ని పనులను చాలా మంది ఇంటి నుంచే చేస్తున్నారు. ఇంతకు ముందు కిరాణా సరుకుల కోసం బయటకు వెళ్లేవారు. కానీ వాటిని ఆన్ లైన్లోనే ఆర్డర్ చేస్తున్నారు. ఇక ఇలాగే ఎన్నో పనులను జనాలు ఆన్లైన్ ద్వారానే పూర్తి చేస్తున్నారు. అయితే ప్రస్తుతం ఇన్సూరెన్స్ కంపెనీలు కూడా వినియోగదారులకు పాలసీలను ఆన్లైన్లోనే ఇస్తున్నాయి. దీంతో పాలసీలను తీసుకోవడం ప్రస్తుతం చాలా సులభతరం అయింది. అయితే ఆన్లైన్లో పాలసీలను తీసుకోవడం వల్ల వినియోగదారులకు పలు లాభాలు కూడా కలుగుతాయి. అవేమిటంటే…
1. సాధారణంగా ఇన్సూరెన్స్ కంపెనీలు ఏజెంట్లను నియమించుకుంటాయి. వారు వినియోగదారులకు పాలసీలను విక్రయిస్తుంటారు. ఒక్కో పాలసీ విక్రయిస్తే వారికి కంపెనీలు నిర్దిష్టమైన కమిషన్ను చెల్లిస్తాయి. అయితే ఆన్లైన్ లో పాలసీ తీసుకోవడం వల్ల ఏజెంట్లు ఉండరు. అందువల్ల ఆ కమిషన్ ను కూడా కంపెనీలు ఏజెంట్లకు చెల్లించాల్సిన పనిలేదు. దీంతో ఆ కమిషన్ మేర మనం కట్టే పాలసీ ప్రీమియంలో మొత్తాన్ని తగ్గిస్తారు. దీంతో పాలసీ మనకు తక్కువకే వస్తుంది. ఆ మేర మనం తక్కువ ప్రీమియం చెల్లించవచ్చు.
2. మనకు ఏజెంట్లు పాలసీలను అమ్మేటప్పుడు వాటి గురించి వారు పూర్తిగా చెప్పరు. కేవలం లాభాల గురించే చెబుతారు. కానీ ఆన్లైన్లో పాలసీ తీసుకుంటే మనం వాటికి చెందిన లాభ నష్టాలను పూర్తిగా తెలుసుకోవచ్చు. పూర్తిగా పారదర్శకమైన పద్ధతిలో మనకు పాలసీ ఇస్తారు. అందువల్ల మనకు ఆన్లైన్లో పాలసీలు తీసుకుంటే ఈ లాభం కలుగుతుంది.
3. ఏజెంట్లు మనకు పాలసీలను ఇచ్చేటప్పుడు మనకు అవసరం లేకున్నా అందులో కొన్ని ఫీచర్లను కలిపి ఇస్తారు. అయితే ఆన్లైన్ లో పాలసీ తీసుకుంటే మనకు స్వేచ్ఛ ఉంటుంది. అందుకని మనకు నచ్చిన ఫీచర్లతోనే పాలసీలను తీసుకోవచ్చు.
4. ప్రస్తుతం మనకు పాలసీలను అనేక కంపెనీలు విక్రయిస్తున్నాయి. అందువల్ల ఏ కంపెనీ ఎలాంటి పాలసీలు అందిస్తుందీ, వాటి ఫీచర్లు ఏమిటీ, పేమెంట్ విధానం ఎలా ఉంటుంది, వాటి వల్ల ఎలాంటి లాభ నష్టాలు ఉంటాయి, ఎంత ప్రీమియం చెల్లిస్తే ఎంత కవరేజీ లభిస్తుంది.. తదితర వివరాలను అన్నింటినీ మనం ఆన్లైన్లో పోల్చి చూసుకోవచ్చు. వాటిలో ఉత్తమమైన పాలసీని మనం ఎంపిక చేసుకోవచ్చు. ఆఫ్ లైన్ లో పాలసీ తీసుకుంటే మనకు ఈ సౌకర్యం ఉండదు.
5. ఆఫ్ లైన్ లో పాలసీ తీసుకుంటే ఇన్సూరెన్స్ ఏజెంట్లకు అనేక రకాల పత్రాలను అందజేయాల్సి ఉంటుంది. అదే ఆన్లైన్ అయితే అంతా డిజిటల్ పద్ధతిలో పూర్తవుతుంది. మనకు సంబంధించిన ధ్రువీకరణ పత్రాలను డిజిటల్ రూపంలోనే సబ్మిట్ చేసి పాలసీ పొందవచ్చు. పైగా చాలా వేగంగా ప్రాసెస్ అయి పాలసీ మన చేతికి వస్తుంది.