రాజకీయ నాయకుల జీవితాలు ఆధారంగా చిత్రాలు నిర్మించే ధోరణి ఎక్కువవుతోంది. ఈ బయోపిక్ల పరంపరకు మరొకటి వచ్చి చేరుతోంది. ఈసారి బయోపిక్ రాహుల్ గాంధీ జీవితంపై. సినిమా పేరు ‘మై నేమ్ ఈజ్ రాగా’ (My Name is RaGa). రూపేష్ పాల్ ఈ సినిమాకు దర్శకత్వం వహిస్తున్నారు. ఈ సినిమా టీజర్ విడుదల చేశారు. ఏప్రిల్లో సినిమా విడుదల అవుతుందని పాల్ పేర్కొన్నారు.
రాహుల్ గాంధీని గొప్పగా చిత్రించడానికి ఈ సినిమా తీయడం లేదని పాల్ ఇండియా ఎబ్రాడ్ న్యూస్ సర్వీస్కు చెప్పారు. వైఫల్యాన్ని భయం లేకుండా ఎదుర్కొన్నవారు ఎవరైనా ఈ సినిమా చూసి తమ గురించే అనుకోగలరు అని పాల్ చెప్పారు. నిజానికి ఇది బయోపిక్ కాదు, వరుస వైఫల్యాల తర్వాత అజేయుడిగా మారిన ఓ వ్యక్తి కథ అన్నారు పాల్.
నెల క్రితం మాజీ ప్రధాని మన్మోహన్ సింగ్పై బయోపిక్ వచ్చింది. బాల్ థాకరే జీవితంపై మరో బయోపిక్ ఇటీవలే రిలీజ్ అయింది. ప్రధాని నరేంద్ర మోదీ జీవితం ఆధారంగా కూడా ఒక సినిమా తీస్తున్నారు.