ఇప్పుడు దేశమంతా ఇదే సంచలనం. “కష్టేఫలి” అన్న దానికి నిలువెత్తు రూపంగా నిలిచింది ఆ అమ్మాయి. మధ్యప్రదేశ్లోని నీమచ్ జిల్లాలో ఆంచల్ గంగ్వాల్ టీ కొట్టు నడుపుకునే సురేష్ గంగ్వాల్ కూతురు. తన ఊరిలోని గవర్నమెంట్ కాలేజీ లో కంప్యూటర్ సైన్స్ లో డిగ్రీ పూర్తి చేసిన తనకు చిన్నప్పటి నుంచి డిఫెన్స్ లో చేరాలని కల. అంతే… చిన్నప్పటి నుంచి తన కల కోసం ఎంతో కష్టపడి చదివింది.
సరే ఏముంది చివరికి ఎయిర్ ఫోర్స్ లో చేరి ఉంటుం… దీనికి ప్రత్యేకంగా చెప్పడం దేనికి? మంచి కోచింగ్ సెంటర్లో కోచింగ్ తీసుకుని ఉంటుంది…. అందుకే క్లియర్ చేయగలిగింది అని మిగతా స్టోరీ మీరే ఊహించుకుంటే అది తప్పు. నేరుగా ఎయిర్ఫోర్స్ లోకి వెళ్లడం కష్టమని భావించిన ఆంచల్ మధ్యప్రదేశ్లో పోలీసు శాఖలో సబ్ ఇన్స్పెక్టర్ గా చేరింది.
ఆ తర్వాత మధ్యప్రదేశ్ పోలీస్ శాఖ వారు ఆంచల్ ను లేబర్ డిపార్ట్మెంట్ లో ఇన్స్పెక్టర్ గా నియమించారు. అలా ఎనిమిది నెలలు పనిచేసిన తర్వాత ఎయిర్ ఫోర్స్ లో చేరాలంటే రాయాల్సిన AFCAT పరీక్ష రాసింది. ఆరవ అటెంప్ట్ లో ఆంచల్ పరీక్ష పాస్ అయ్యి నెక్స్ట్ లెవెల్ కి వెళ్ళింది. తన తల్లిదండ్రులు తను ఎయిర్ఫోర్స్లో చేరుతానంటే మొదట కొంచెం భయపడ్డారు. కానీ తనని ఆపలేదు. తర్వాత తన పట్టుదల చూసి వాళ్లే ఆంచల్ ని ప్రోత్సహించారు.
కట్ చేస్తే.. జూన్ 20, 2020 అంటే మొన్న శనివారం తన ట్రైనింగ్ పూర్తి చేసుకుని ఇండియన్ ఎయిర్ ఫోర్స్ అకాడమీ నుండి గ్రాడ్యుయేట్ అయింది. హైదరాబాద్ లోని దిండిగల్ లో జరిగిన పరేడ్ లో పాల్గొని ప్రెసిడెంట్ చేతులమీదుగా షీల్డ్ తీసుకుంది. ఆ సమయంలో తమ కూతురు ప్రెసిడెంట్ చేతులమీదుగా షీల్ష్ అందుకోవడం చూడలేకపోయిన తల్లిదండ్రులు తమ కూతురిని టీవి లో చూసుకుని సంతోషించారు.
ఆంచల్ గురించి అందరూ ప్రత్యేకంగా మాట్లాడుకోవడానికి కారణం ఏమై ఉంటుందో ఈపాటికి మీకు అర్థమయ్యే ఉంటుంది. పెద్ద కలలు కనడానికి మనం ఇప్పుడు ఏ స్థాయిలో ఉన్నాం అనేది ముఖ్యం కాదు మనం ఆ కలని సాధించడానికి ఎంతో కష్టపడుతున్నాం అనేదే ముఖ్యం అని ఆంచల్ మళ్లీ రుజువు చేసింది. ఆ సంవత్సరం ఎయిర్ ఫోర్స్ పరీక్షలు క్లియర్ చేసిన ఏకైక అభ్యర్థి ఆంచల్. అది తన కష్టానికి దక్కిన విలువ, గౌరవం.
