భారతదేశం గర్వించదగ్గ దర్శకుల్లో ఎస్ ఎస్ రాజమౌళికి ప్రత్యేకమైన స్థానం ఉంది. ప్లాప్ అన్నదే లేకుండా సినిమా తీయడం అనేది చాలా అరుదైన విషయం. బహుశా భారతదేశంలోనే ఏ దర్శకుడికీ ఈ ఘనత దక్కి ఉండకపోవచ్చు. బాహుబలితో భారతదేశాన్ని కాక అంతర్జాతీయ స్థాయిలో గుర్తింపు అందుకున్నాడు రాజమౌళి.
బాహుబలి తర్వాత కొన్నేళ్ల విరామం తీసుకున్న రాజమౌళి ప్రస్తుతం తెరకెక్కిస్తున్న సినిమా ఆర్ ఆర్ ఆర్. రామ్ చరణ్, ఎన్టీఆర్ లు ఈ సినిమాలో హీరోలుగా నటిస్తోన్న విషయం తెల్సిందే. రామ్ చరణ్ అల్లూరి సీతారామరాజు పాత్రలో, ఎన్టీఆర్ కొమరం భీమ్ పాత్రలో కనిపించనున్నారు. ఈ సినిమా షూటింగ్ దాదాపు 70 శాతం పూర్తయ్యాక లాక్ డౌన్ కారణంగా విరామం పడింది. అసలే రాజమౌళి సినిమాలు ఆలస్యమవుతాయని చాలా బ్యాడ్ టాక్ ఉంది. ప్రతీ ఒక్కరూ ఈ విషయంలో మీమ్స్ చేసి కామెడీ చేస్తుంటారు. రాజమౌళి ఆలస్యానికి తోడు కరోనా వైరస్ ఉండడంతో షూట్ మరింత వాయిదా పడింది.
ప్రస్తుత పరిస్థితి ప్రకారం ఆర్ ఆర్ ఆర్ షూట్ ను వచ్చే ఏడాది సెకండ్ హాఫ్ లో కానీ విడుదల చేయలేని పరిస్థితి. ఇక భారీ బ్రేక్ తర్వాత రాజమౌళి మళ్ళీ ఆర్ ఆర్ ఆర్ షూట్ ను మొదలుపెడుతున్నాడు. అక్టోబర్ రెండో వారం నుండి షూట్ మొదలవుతుందని తెలుస్తోంది. ఈ చిత్రంలో రామ్ చరణ్ కు జోడిగా అలియా భట్ హీరోయిన్ గా ఎంపికైంది. ఆమె సీత పాత్రలో కనిపించనుంది.
అయితే అలియా భట్ ఇండియాలో బిజీ కథానాయిక. ఆమె చేతిలో ఇప్పుడు పలు భారీ సినిమాలు ఉన్నాయి. ఈ నేపథ్యంలో ఆర్ ఆర్ ఆర్ కోసం కేవలం రెండు నెలల కాల్ షీట్స్ మాత్రమే ఇవ్వడానికి ఆమె సిద్ధంగా ఉందిట. కరోనా వైరస్ కారణంగా నటీనటులు కాల్ షీట్స్ అన్నీ అస్తవ్యస్తమయ్యాయి. దీంతో ఇప్పుడు రాజమౌళి ఇచ్చిన రెండు నెలల కాల్ షీట్స్ లోనే అలియా భట్ పోర్షన్ ను పూర్తి చేయాల్సి ఉంది.