హైదరాబాద్: ఎన్నికల బరిలో నిలిచిన తన మామయ్యలు జనసేన అధినేత పవన్ కళ్యాణ్, నాగబాబుకు మద్దతు తెలుపుతూ సినీ నటుడు అల్లు అర్జున్‌ ఒక ప్రకటన విడుదల చేశారు. ‘మా మద్దతు, ప్రోత్సాహం మీకెప్పుడూ ఉంటాయి’ అని ప్రకటనలో పేర్కొన్నారు
‘ఆంధ్రప్రదేశ్‌ ప్రజలకు సేవ చేయడానికి రాజకీయాల్ని ఎంచుకున్న నాగబాబుకు శుభాకాంక్షలు. ఈ రాజకీయ ప్రయాణంలో ఆయన విజయం సాధించాలని కోరుకుంటున్నా. రానున్న ఎన్నికల ప్రచారంలో మేం మీతో లేకపోయినా మీకు, సమాజ అభివృద్ధికి మా పూర్తి మద్దతు ఎప్పుడూ ఉంటుంది. రాజకీయాల్లో విజయవంతంగా రాణిస్తున్న పవన్ కళ్యాణ్, జనసేన పార్టీ కోసం పనిచేస్తున్న వారందరికీ నా అభినందనలు. పవన్ కళ్యాణ్ తన న్యాయకత్వం, అద్భుతమైన విజన్‌తో ఆంధ్రప్రదేశ్‌ ప్రజల జీవితాల్లో కొత్త వెలుగులు తీసుకొస్తారని ఆశిస్తున్నా’ అని అల్లు అర్జున్‌ ప్రకటనలో పేర్కొన్నారు.
పవన్ కళ్యాణ్ పశ్చిమ గోదావరి జిల్లా భీమవరం అసెంబ్లీ స్థానం నుంచి, అదే పార్టీ తరఫున నరసాపురం లోక్‌సభ నియోజకవర్గం నుంచి నాగబాబు పోటీ చేస్తున్న సంగతి తెలిసిందే. విశాఖ జిల్లా గాజువాక అసెంబ్లీ స్థానం నుంచి కూడా పవన్‌పోటీ చేస్తున్న విషయం విదితమే.
