కాజల్ అగర్వాల్ టాలీవుడ్…కోలీవుడ్..బాలీవుడ్ లో వరసగా సినిమాలు చేస్తుంది. లేవు లేవు అనుకుంటూనే వచ్చిన ప్రతీ అవకాశాన్ని ఒడిసి పట్టుకుంటుంది. ఇటీవల తమిళ దర్శకుడు వెంకట్ ప్రభు దర్శకత్వంలో రూపొందనున్న వెబ్ సిరీస్ కి గ్రీన్ సిగ్నల్ ఇచ్చినట్టు వార్తలు వచ్చాయి. త్వరలో ఈ వెబ్ సిరీస్ మొదలవబోతుందట. అలాగే టాలీవుడ్ లో తేజ – గోపీచంద్ కాంబినేషన్ లో తెరకెక్కనున్న అలిమేలిమంగ వెంకటరమణ కోసం కూడా కాజల్ ని తీసుకోవాలనుకుంటున్నారట.
ఇక ఇప్పటికే కొరటాల శివ, మెగాస్టార్ చిరంజీవి కాంబినేషన్ లో తెరకెక్కుతున్న ఆచార్య సినిమాలో హీరోయిన్ గా నటిస్తుంది. అలాగే పాన్ ఇండియా సినిమాగా శంకర్, కమల్ హాసన్ కాంబినేషన్ లో రూపొందుతున్న ‘ఇండియన్ 2’ లో నటిస్తుంది. ఈ సినిమాలతో పాటు బాలీవుడ్ లో ముంబై సాగా చేస్తుంది. ఇలా వరసగా మూడు పెద్ద ప్రాజెక్ట్స్, వెబ్ సిరీస్ చేస్తున్న కాజల్ కి తాజాగా మరో భారీ సినిమాలో నటించే ఛాన్స్ వచ్చిందని సమాచారం.
తమిళ స్టార్ హీరో ఇలయదళపతి విజయ్ – టాలెంటెడ్ డైరెక్టర్ మురుగదాస్ కాంబినేషన్ లో రూపొందనున్న సినిమాలో కాజల్ సెకెండ్ హీరోయిన్ గా సెలెక్ట్ చేసుకున్నట్టు తెలుస్తుంది. సెకండ్ హీరోయిన్ అయినప్పటికీ కాజల్ క్యారెక్టర్ కి చాలా ఇంపార్టెన్స్ ఉంటుందట. కరోనా వ్యాప్తి తగ్గగానే ఈ సినిమా సెట్స్ మీదకి వెళ్ళబోతుందట. విజయ్ – మురగదాస్ కలయికలో వచ్చిన ‘తుపాకి’ లో కాజల్ హీరోయిన్ గా నటించింది. అంతేకాదు ఇప్పటి వరకు కాజల్, విజయ్ కాంబినేషన్ లో ‘మెర్సల్’,’ జిల్లా’ సినిమాలు వచ్చి బ్లాక్ బస్టర్స్ గా నిలిచాయి.