AP Cabinet Expansion: ఆంధ్రప్రదేశ్ మంత్రివర్గ విస్తరణకు మూహూర్తం ఖరారు అయ్యింది. వచ్చే నెల 11వ తేదీన మంత్రివర్గ విస్తరణ చేపట్టనున్నట్లు సమాచారం. రెండున్నరేళ్లకు మంత్రివర్గ విస్తరణ ఉంటుందని సీఎం వైఎస్ జగన్ ప్రమాణ స్వీకారం రోజునే చెప్పిన సంగతి తెలిసిందే. కరోనా, తదితర కారణాల వల్ల మంత్రి వర్గ విస్తరణ వాయిదా పడినట్లు సమాచారం. మంత్రివర్గ విస్తరణపై ఇప్పటికే ప్రస్తుతం ఉన్న మంత్రులకు కూడా ఇటీవల జరిగిన కేబినెట్ భేటీలో జగన్ క్వాలిటీ ఇచ్చేశారు. ప్రస్తుతం ఉన్న మంత్రులను జిల్లా పార్టీ సేవలకు వినియోగించుకుంటామని తెలిపారు.
AP Cabinet Expansion: ఏప్రిల్ 11వ తేదీన విస్తరణ..?
వాస్తవానికి వైసీపీ ప్లీనరీ తర్వాత మంత్రి వర్గ విస్తరణ చేపట్టాలని భావించినా ఏప్రిల్ 11వ తేదీన విస్తరణ చేపట్టాలని జగన్ నిర్ణయానికి వచ్చారని అంటున్నారు. ఉగాది నాటికే కొత్త జిల్లాల ఏర్పాటు కూడా పూర్తి అవుతున్నందున ఆ జిల్లాల ప్రాతిపదికన సామాజిక సమీకరణలను పరిగణలోకి తీసుకుని జిల్లాకు ఒకరు చొప్పున మంత్రి వర్గంలోకి తీసుకునేందుకు ఇప్పటికే జగన్ ఒక జాబితా రూపొందించారని చెబుతున్నారు. అయితే ప్రస్తుతం ఉన్న మంత్రుల్లో ముగ్గురు లేదా నలుగురుని మాత్రమే కంటిన్యూ అయ్యే అవకాశాలు ఉన్నట్లు ప్రచారం జరుగుతోంది.
పలువురు సీనియర్ నేతలకు ముందస్తుగా శుభాకాంక్షలు
మరో రెండు వారాల్లోపు మంత్రివర్గ విస్తరణ జరగనుండటంటో కాబోయే కొత్త మంత్రుల లిస్ట్ ఇదే అంటూ ఒకటి సోషల్ మీడియాలో చక్కర్లు కొడుతోంది. పలువురు సీనియర్ నేతలకు ఇప్పటి నుండి సన్నిహితులు, స్నేహితులు ముందస్తుగానే కాబోయే మంత్రిగారూ అంటూ శుభాకాంక్షలు కూడా తెలియజేస్తున్నారు. మంత్రి పదవులకు ఆశావహులు ఎక్కువగా ఉండటంతో అవకాశం కల్పించలేని నేతలు అసంతృప్తికి గురి కాకుండా ఉండేందుకు ముందుగా వారిని పిలిచి మాట్లాడే ప్రయత్నాలు చేయనున్నారని సమాచారం.