వైకాపా ప్రభుత్వ హయాంలో జరుగుతున్న టీడీపీ నేతల మొత్తం అరెస్టులన్నింటినీ అక్రమ అరెస్టులుగానే చూపించే ప్రయత్నం చేస్తున్నారు ఏపీ ప్రతిపక్షనేత చంద్రబాబు! అవినీతి కేసులో అచ్చెన్నాయుడు అరెస్టయినా.. అక్రమాల కేసులో జేసీ ప్రభాకర్ రెడ్డి అరెస్టయినా.. ఒళ్లు తెలియకుండా మహిళా కమిషనర్ పై అయ్యన్న పాత్రుడిపై కేసులు నమోదైనా, ఇక ప్రత్యేకంగా ఇది కేసు అని చెప్పుకోలేనన్ని కేసులున్న చింతమనేని ప్రభాకర్ ని అరెస్టు చేసినా… ఒకటో రెండో కాదు… పసుపు కండువా కప్పుకున్న ఎవరిని అరెస్టు చేసినా, కేసులు పెట్టినా… వీటన్నింటినీ బాబు అక్రమ కేసులుగానూ, వారందరినీ నిరపరాదులు గానూ ప్రకటించేస్తున్నారు! ఈ క్రమంలో ఏపీ డీజీపీకి లేఖ రాసిన సంగతి తెలిసిందే!
తెలుగుదేశం పార్టీ నేత‌ల‌పై వైసీపీ ప్ర‌భుత్వం క‌క్ష‌పూరితంగానూ.. తెలుగుదేశం పార్టీ నేత‌ల‌ను భ‌య‌బ్రాంతుల‌కు గురి చేసేలానూ వైసీపీ వ్య‌వ‌హ‌రిస్తోంద‌ని ఆరోపించారు మాజీ ముఖ్య‌మంత్రి చంద్రబాబు నాయుడు! ప్రభుత్వమే ప్రజలపై ప్రతీకార చర్యలు కొనసాగిస్తుంటే.. అందుకు పోలీసు శాఖ స‌హ‌క‌రించ‌డం ఏమాత్రం త‌గ‌ద‌ని బాబు అన్నారు. కొంత‌మంది అధికారులు వ్య‌వ‌హ‌రిస్తున్న తీరు అస్స‌లు బాగోలేద‌ని, నిబంధ‌న‌ల‌ను పాటించ‌డం లేద‌ని ఆ లేఖలో పేర్కొన్నారు. పోలీస్ బాస్ గా పోలీసు వ్యవస్థ, ప్రజాస్వామ్య వ్యవస్థ లను కాపాడాల్సిన బాధ్యత మీపై ఉందని డీజీపీకి గుర్తు చేసే ప్రయత్నం చేశారు బాబు!
ఆ లేఖలో ఆరోపణల సంగతి అలా ఉంటే… ఈ రేంజ్ లో బాబు లేఖ రాసేసరికి… ఏపీ డీజీపీ స్పందించారనే వార్తలు వస్తున్నాయి. బాబు లేఖను పరిగణలోకి తీసుకున్న పోలీస్ పెద్ద బాస్… బాబుకు అపాయింట్ మెంట్ ఇచ్చారని అంటున్నారు! ఈ కథనాలు నిజమయ్యి డీజీపీ గనుక బాబుకు అపాయింట్ మెంట్ ఇస్తే… అది కచ్చితంగా హాట్ టాపిక్కే!! దీంతో ఏపీలో కొత్త రాజకీయం స్టార్ట్ అవ్వబోతోందా అని పొలిటికల్ సర్కిల్స్ లో డిస్కషన్స్ జరుగుతున్నాయి!
