రాష్ట్రాన్ని మళ్లీ కలిపేయాలంటూ ఏపి మంత్రి బొత్స ఆసక్తికర వ్యాఖ్యలు

ఏపి మంత్రి బొత్స సత్యనారాయణ నేడు ఆసక్తికర వ్యాఖ్యలు చేశారు. విలీన మండలాలను తెలంగాణలో కలిపివేయాలని వాళ్లు అంటే..మళ్లీ రాష్ట్రాన్ని కలిపివేయాలని తాము డిమాండ్ చేస్తామని వ్యాఖ్యానించారు మంత్రి బొత్స. ఏపిలో నిర్మిస్తున్న పోలవరం ప్రాజెక్టుతో భద్రాచలానికి ముంపు పొంచి ఉందనీ, ఇటీవల వచ్చిన వరద పరిస్థితులకు అదే కారణమని పేర్కొన్న తెలంగాణ మంత్రి పువ్వాడ అజయ్..ఏపిలో విలీనమైన ఏడు మండలాలను తిరిగి తెలంగాణలో కలపాలని డిమాండ్ చేశారు. తెలంగాణ మంత్రి పువ్వాడ అజయ్ వ్యాఖ్యలను మీడియా ప్రతినిధులు ఏపి మంత్రి బొత్స వద్ద ప్రస్తావించగా తనదైన శైలిలో ఆసక్తికర వ్యాఖ్యలు చేశారు.

విలీన మండలాలను తెలంగాణలో కలపాలని వాళ్లు అంటే.. మళ్లీ రాష్ట్రాన్ని కలిపివేయాలని తాము డిమాండ్ చేస్తామని బొత్స వ్యాఖ్యానించారు. మాట్లాడే వ్యక్తులు బాధ్యతగా ఉండాలన్నారు. సమస్యను పరిష్కరించుకునే విధంగా ఉండాలే తప్ప రెచ్చగొట్టేలా వ్యవహరించకూడదని అన్నారు. ఖమ్మం జిల్లాలోని ముంపు ప్రాంతాల సంగతి పువ్వాడ చూసుకుంటే సరిపోతుందన్నారు. పోలవరం ఎత్తు ఎవరు పెంచారని ప్రశ్నించారని పోలవరం నిర్మాణం అనుమతి పొందిన డిజైన్ ప్రకారమే జరుగుతుందని వాటిని ఎవరూ మార్చలేరని పేర్కొన్నారు. పోలవరం వల్ల భద్రాచలం ముంపు ఉంటుందని ఉమ్మడి రాష్ట్రంలోనూ ప్రస్తావించిన విషయాన్ని బొత్స గుర్తు చేశారు. ముంపు మండలాల బాధ్యత ఏపిదేనని బొత్స పునరుద్ఘాటించారు.

ముంపు మండలాల ప్రజలు ఏపి రాష్ట్ర కుటుంబ సభ్యులని ఆయన స్పష్టం చేశారు. రాష్ట్ర విభజన వల్ల హైదరాబాద్ ఆదాయాన్ని ఏపి కోల్పోయిందని పేర్కొన్న బొత్స.. అందుకని హైదరాబాద్ ను ఏపి కలిపివేయామని అడగగలమా అని ప్రశ్నించారు. గతంలా ఉమ్మడి రాష్ట్రంగా ఉండాలని అడిగితే బావుంటుందా అలా అయితే చెసేయమనండి, ఉమ్మడి రాష్ట్రంగానే ఉంచమని చెప్పండి.ఇప్పుడు రెండ రాష్ట్రాలు కలిస్తే ఎవరికీ ఇబ్బంది కదా అంటూ బొత్స ఆసక్తికర వ్యాఖ్యలు చేశారు.