AP Minister Vs PK Fans: పవర్ స్టార్ పవన్ కల్యాణ్ అభిమానుల తాజా టార్గెట్ రాష్ట్ర దేవాదాయశాఖ మంత్రి వెల్లంపల్లి శ్రీనివాస్ అయ్యారు.”సిగ్గులేని వెధవ వెల్లంపల్లి” అన్న హ్యాష్ ట్యాగ్ తో ఆయనపై వారు విరుచుకుపడుతున్నారు. దాదాపు లక్ష ట్వీట్లు దాటిపోవడంతో ఇప్పుడు ట్విట్టర్ లో అదే ట్రెండింగ్ టాపిక్ అయింది.పవన్ కల్యాణ్ అభిమానులకు ఈ మంత్రిగారిపై ఎందుకు కోపం వచ్చిందన్న విషయం లోకి వెళ్తే ..ముందు జనసైనికులే ఆయనను కెలికారు.
AP Minister Vs PK Fans: అసలేం జరిగిందంటే?
ఆలయాల్లో పారిశుధ్య కార్మికుల నియామకాలకు కూడా దేవాదాయశాఖ మంత్రి వెల్లంపల్లి శ్రీనివాస్ లంచాలు తీసుకుంటున్నారంటూ జనసైనికులు ఈ మధ్య సోషల్ మీడియాలో పోస్టింగులు పెడుతూ వస్తున్నారు.అంతేగాక ఆయనపై ఇతరత్రా కూడా అనేక ఆరోపణలు చేస్తున్నారు.దీంతో మంత్రి గారికి కోపం వచ్చింది.ప్రెస్ మీట్ పెట్టేసి పవన్ కల్యాణ్ ని,ఆయన అభిమానులను,జన సైనికులను తిట్టేశారు.రెండుచోట్ల పోటీ చేసి కూడా గెలవలేకపోయాడు పవన్ కల్యాణ్ అంటూ ఎద్దేవా చేశారు.విజయవాడలో కూడా ఏమాత్రం పరపతి చూపించలేకపోయాడు మీ నాయకుడని ఎగతాళి చేశారు. అంతటితో ఆగకుండా పవన్ కల్యాణ్ అభిమానులంతా సిగ్గులేని వెధవలని మంత్రి గారు దూషించారు.దీంతో చిచ్చురాజుకుంది. ఇప్పుడు పవన్ కల్యాణ్ అభిమానులు సోషల్ మీడియాలో తమ ప్రతాపం చూపుతున్నారు.
ఆ బాపతు నువ్వే అమాత్యా!
సిగ్గులేని వెధవలం మేం కాదు..ఆ బాపతు నువ్వేనంటూ మంత్రిగారిపై వారు ట్వీట్ల వార్ ప్రకటించారు. .”సిగ్గులేని వెధవ వెల్లంపల్లి”అనే హ్యాష్ట్యాగ్ జోడించి వారు మంత్రిని ఆడుకుంటున్నారు.అసలే పవన్ కల్యాణ్ కు ఫ్యాన్ ఫాలోయింగ్ అధికం కాబట్టి,ఆయనపై ఈగవాలితే వాళ్ళు సహించరు కాబట్టి ఈ ట్వీట్లు లక్ష దాటిపోయాయి.
మంత్రిపై వారికి ఇంకో కోపం కూడా వుంది!
జన సైనికులకు, పవన్ కల్యాణ్ అభిమానులకు మంత్రిపై వేరే కోపం కూడా వుంది.గతంలో వెల్లంపల్లి శ్రీనివాస్ ప్రజారాజ్యం పార్టీ తరపున ఎమ్మెల్యేగా ఎన్నికైనప్పుడు ఆయనకు పవన్ కల్యాణ్ కి మధ్య సత్సంబంధాలు ఉండేవి.2014 లో బిజెపి నుండి పోటీచేసిన వెల్లంపల్లి శ్రీనివాస్ తరపున ప్రచారానికి టిడిపి బిజెపి కూటమి పక్షాన పవన్ కల్యాణ్ వచ్చారు.ఆ సమయంలో పవన్ కల్యాణ్ ముందు వెల్లంపల్లి శ్రీనివాస్ సాగిలపడుతూ అతివినయం ప్రదర్శించారని,అలాంటి వెల్లంపల్లి వైసిపి ప్రభుత్వం లో మంత్రి కాగానే పవన్ కల్యాణ్ ని విమర్శించటం లెక్కలేనట్లు మాట్లాడుతున్నారని పవర్ స్టార్ ఫ్యాన్స్ రగిలిపోతున్నారు.ఇప్పుడా అవకాశం రావడంతో వారు ఆ కసినంతా తీర్చుకుంటున్నట్టు కనిపిస్తోంది.ఈ వివాదం ఏ మలుపు తిరుగుతుందో చూడాలి.