(అమరావతి “న్యూస్ ఆర్బిట్” స్పెషల్ బ్యూరో)
ఏపీ పోలీసులు స్కోచ్ అవార్డు ల పంట పండించారు. ఏకంగా 48 అవార్డులు దక్కించుకుని దేశంలోనే మరోసారి ఏపీ పోలీసుల సత్తాని చాటారు. ఈసారి మొత్తం 83 అవార్డులను ప్రకటిస్తే దాని లో ఏకంగా ఏపీ పోలీసులు 48 అవార్డులు గెలుచుకోవడం విశేషం. కేరళ 9 అవార్డు లను గెలుచుకుని రెండో స్థానంలో ఉంటే, మహారాష్ట్ర, పచ్ఛిమబంగా 4 గేసి అవార్డులు గెల్చుకున్నాయి. మరో తెలుగు రాష్ట్రం తెలంగాణ ఒకే అవార్డుతో సరిపుచ్చుకుంది.
ఏమిటీ అవార్డ్??
స్కోచ్ సంస్థ 2003 నుంచి అవార్డుల ను అందిస్తోంది. వ్యక్తిగత విభాగంతో పాటు సంస్థల సేవలు గుర్తింపు విడివిడిగా అవార్డు ఇస్తోంది. దీనిని కేంద్ర ప్రభుత్వం కూడా సేవల అత్యున్నత పురస్కారం కింద గుర్తించింది. టెక్నాలజీ, ఫైనాన్షియల్ , సామాజిక అనే మూడు విభాగాల కింద సేవలను గుర్తిస్తూ ఈ అవార్డులను గోల్డ్ సిల్వర్ రూపంలో ఇస్తోంది. అంటే ప్రతి విభాగానికి గోల్డ్, సిల్వర్ విజేతలు ఉంటారు. గత ఏడేళ్లుగా ఈ అవార్డులకు పోటీపడుతున్న ఆంధ్రప్రదేశ్ పోలీసులు ప్రతియేటా ఉత్తమ ప్రతిభ కనబరుస్తూ అవార్డును అందుకున్నారు. ఈసారి ఏకంగా 55 శాతం అవార్డులను రాష్ట్ర పోలీసులే అందుకోవడం విశేషం. వ్యక్తిగత విభాగంలో 20 అవార్డులు, సంస్థ విభాగంలో 24 అవార్డులు, ఏపీ సీఐడీకు 4 అవార్డులు వెరసి 48 అవార్డులు దక్కించుకున్నారు.
సీఐడీ వరుసగా…!!
ఏపీ సి ఐ డి విభాగం స్కోచ్ అవార్డులను వరుసగా దక్కించుకుంటోంది. గత సంవత్సరం మూడు అవార్డులు ఏపీ సిఐడి సాధిస్తే ఈ ఏడాది 4 అవార్డును సాధించి ఓ మెట్టు ముందే ఉంది. ఈసారి సాంకేతికత, ఫైనాన్సు, సామాజిక రంగాల్లో మూడు విభాగాల్లోనూ సిఐడి సత్తా చాటింది. ఆర్థికపరమైన కేసుల విచారణ, వాటి దర్యాప్తులో వాడిన సాంకేతికత ఆధారంగా ఈసారి సి.ఐ.డి ప్రతిభ కనబరిచింది. గత సంవత్సరం కంటే ఆర్థిక మూలాలు ఉన్న కేసులను రెండు శాతం మేర నమోదు చేసి, వాటి దర్యాప్తులో ముందు ఉండటంతో పాటు మూడు ప్రత్యేక కేసుల్లో సిఐడి తన ప్రతిభను డాక్యుమెంటేషన్ రూపంలో స్కోచ్ జ్యూరీకి పంపి సత్తా చాటింది.
కోవిడ్ థీమ్ లో ముందు..!!
ఏటా ఒక థీమ్ పేరుతో అవార్డులను ప్రకటించే స్కోచ్ ఈ సారి అవార్డులకు కోవిడ్ కట్టడిలో వ్యవహరించిన తీరు థీమ్ గా తీసుకుంది. కోవిడ్ నివారణ చర్యల్లో పోలీసులు చూపిన చొరవ సామాజిక విభాగంలో అవార్డుల పంట పండించింది. దీంతోపాటు దిశ పోలీస్ స్టేషన్లు పోలీసు సేవ యాప్ సాంకేతిక విభాగంలో అదరగొట్టాయి. మొత్తంగా ఈ సారి స్కోచ్ అవార్డుల జాబితాలో అంత తెలుగు కళ ఉట్టిపడింది.
