జగన్ ప్రభుత్వ హయాములో ఆంధ్రప్రదేశ్ లో కక్ష సాధింపు రాజకీయాలు జరుగుతున్నాయి అనేది టీడీపీ నేతల ప్రధాన ఆరోపణ. ఇది నిజమే అన్నట్లు కూడా పరిణామాలు సంభవిస్తున్నాయి..మొన్న అచ్చెన్నాయుడు నిన్న జేసీ దివాకర్రెడ్డి అరెస్టులు ఇక్కడ గమనార్హం. తాజాగా టిడిపిలో మరో ఫైర్ బ్రాండ్ నేతను కూడా లక్ష్యంగా చేసుకుని వైసిపి ప్రభుత్వం పావులు కదుపుతున్నట్లు కనిపిస్తోంది .
ఇందుకోసం అన్ని విధాలుగా పోలీసుల సహకారం కూడా తీసుకుని, తన బలాన్ని వాడి ఇబ్బంది పెట్టే విధంగా రాజకీయం చేస్తుంది. ఆయనే చింతమనేని ప్రభాకర్. టీడీపీకి ఆయన ఫైర్ బ్రాండ్. ఆయనకు యువత, వెనుకబడిన వర్గాల్లో మంచి ఫాలోయింగ్ ఉంది. టిడిపి నేతల అక్రమ అరెస్టులను నిరసిస్తూ ఆయన పిలుపు ఇవ్వగానే చాలా మంది కార్యకర్తలు నిరసన తెలపడానికి రోడ్ల మీదకు వచ్చారు. అంతే..కరోనా యాక్ట్ పేరుతొ ఆయన నిరసనను కట్టడి చేసే ప్రయత్నం చేసిన పోలీసులు ఏకంగాఆయనపై ఏడు కేసులు నమోదు చేశారు.. కరోనా పేరుని వాడుకుని తమ పార్టీ నాయకులను ఇబ్బందులు పెడుతున్నారని టిడిపి నేతల వాపోయారు.
రాజకీయంగా ఆయనకు ఇప్పుడు పదవి ఏమీ లేదు. కేవలం ఒక మాజీ ఎమ్మెల్యే. అయినా ఆయన జనాల్లోకి వస్తే చాలు, కేసులు మీద కేసులు పెడుతూ ఇబ్బంది పెడుతున్నారన్నది టిడిపి నేతల వాదన. ఆయన పోలీసుల విధులకు ఆటంకం కలిగించారు అన్నది పోలీసుల కథనం.అయితే చింతమనేని ప్రజల్లోకి వస్తున్న ప్రతీసారి కూడా ఇదే విధంగా కేసులను నమోదు చేస్తున్నారని ఆయన అభిమానులు, పార్టీ వర్గాలు ఆరోపిస్తున్నాయి.
