బాలీవుడ్ లో రెండు సంవత్సరాల క్రితం విడుదలై మంచి విజయాన్ని అందుకున్న చిత్రం ‘అంథాధూన్’. ఆయుష్మాన్ ఖురానా హీరోగా నటించిన ఈ చిత్రంలో రాధికా ఆప్టే హీరోయిన్ గా నటించగా, టబు కీలక పాత్ర పోషించింది. కాగా ఈ మూవీనీ తెలుగులో రీమేక్ చేయడానికి హీరో నితిన్ రీమేక్ రైట్స్ కొన్న సంగతి తెలిసిందే. ఇప్పటికే ఈ సినిమా కి సంబంధించిన అధికారక ప్రకటన కూడా వచ్చింది.
ఈ చిత్రంలో నితిన్ కి జంటగా నభా నటేష్ .. అలాగే బాలీవుడ్ లో టబు పోషించిన పాత్రను ఇక్కడ తమన్నా చేయనున్నారు. అయితే హిందీ ఒరిజినల్ వెర్షన్ లో చూపించినట్లు తెలుగులో కూడా హీరో-హీరోయిన్ల మధ్య హాట్ రొమాంటిక్ సన్నివేశాలు ఉంటాయని ఆశిస్తున్న అభిమానుల నిరాశ తప్పదని అంటున్నారు. ఎందుకంటే ఒరిజినల్ వెర్షన్ లో చూపించినట్లుగా లిప్ లాక్, మితిమీరిన ఘాటు రొమాన్స్ ని తెలుగు రిమేక్ లో చూపించడం లేదని సమాచారం. ఈ విషయం తెలిసే నభా నటేష్ ఈ చిత్రాన్ని ఒప్పుకుందట.
ఇక ‘అంథాధూన్’ రీమేక్ లో తన పాత్రకు సౌత్ టచ్ ఉంటుందని క్లారిటీ ఇస్తూ, హిందీలో రాధికా చేసినట్లు రొమాంటిక్ సీన్లలో నటించాల్సిన అవసరం లేదని మేకరస్ ఇప్పటికే చెప్పారట. ఇక నభా పాత్రకు సంబంధించిన సన్నివేశాలు మాత్రమే కాదని.. టబు పోషించిన నెగెటివ్ రోల్ లో కూడా మార్పులు చేసినట్లు తెలుస్తోంది. అలా మార్పులు చేసిన తరువాత తమన్నా ఆ పాత్రలో నటించడానికి అంగీకరించిందని సమాచారం.
కాగా మేర్లపాక గాంధీ దర్శకత్వం వహిస్తున్న ఈ సినిమా షూటింగ్ లో నవంబర్ మూడవ వారం నుండి పాల్గొంటానని నభా వెల్లడించింది. మొత్తానికి నభా నటేష్ అందాల ప్రదర్శన చూద్దాం అనుకున్న అభిమానులకు ఈ సినిమాలో ఆ విందు లేదని అర్ధం అవుతుంది. ఈ కారణంగానే నితిన్ సినిమాని నభా నటేష్ కళ్ళు మూసుకొని ఒప్పుకుందని తెలుస్తుంది.