Proverbs: 1. అర్ధరాత్రి వేళ మద్దెల దరువు :
ప్రశాంతంగా ఉండి, అందరూ నిద్రించే అర్ధరాత్రి సమయములో మద్దెలను వాయిన్చడం వలన బాగా శబ్దము వచ్చి, నిద్రా భంగము జరుగుతుంది. అంటే సమయం కాని సమయంలో చేయకూడని పనులు చేస్తే, ఈ సామెతను వాడతారు.
2. అందరూ అందలమే ఎక్కితే, మోసేవారు ఎవరు?:
అందలం అంటే పల్లకి అని అర్ధం. పల్లకీ అందులో ఎక్కిన వారి ప్రత్యేకతను చాటుతుంది.
సమయ సందర్భాలను బట్టి పల్లకి ఎక్కడం అనేది జరుగుతుంది. ఉదా: పెళ్లి లో పెళ్ళికూతురు,ఇంతకు ముందు కాలం లో రాజ్య పాలకులు వంటి ప్రత్యేక మైన వారు పల్లకీలో కూర్చుంటే దానిని సేవకులు మోస్తారు. అలా కాకుండా కాకుండా, మేమూ పల్లకీ ఎక్కుతామని సేవకులంటే, మరి మోసేవారు ఎవరూ అనే ప్రశ్న వస్తుంది. కాబట్టి సమయ సందర్భాలను బట్టి ఎవరు చేసే పని వారు చేయాలి .
3. అమ్మ కళ గుమ్మం లోనే తెలుస్తుంది:
ఇంటిని చూసి ఇల్లాలిని చూడు అనే సామెత కు దగ్గర గా ఉంటుంది ఈ సామెత.
ఒక ఇల్లాలు చూపే మర్యాద, ఆమె తీరు, పద్ధతి ఆ ఇంటిలోనికి వేళ్ళకు ముందే , గుమ్మం దగ్గర ఆహ్వానించే పద్దతిని బట్టే తెలిసిపోతుంది.
4.అయోగ్యుడికి అక్షతలు ఇస్తే, అవతలకు పోయి నోట్లో వేసుకున్నాడట:
అక్షింతలను పూజకు ఉపయోగిస్తారు. వాటిని తెలివి లేని వానికి ఇస్తే, ఏమి చేయాలో తెలియక నోట్లో వేసుకున్నాడట. ఒక విలువైన దానిని, విలువ తెలియని వారి చేతికి ఇస్తే, దానిని ఉపయోగించుకోక పోగా, వృధా చేస్తారని దీని అర్ధం.
