నాలుగో సీజన్ బిగ్ బాస్ కి అతిపెద్ద హైలెట్ అక్కినేని నాగార్జున ప్లేస్ లో సమంత హోస్ట్ గా రావటం. ఫస్ట్ టైం టెలివిజన్ రంగంలో అక్కినేని వారి ఇంటి కోడలు సమంత హోస్ట్ గా చేసి టెలివిజన్ ప్రేక్షకుల హృదయాలను దోచేసింది. సరైన టైమింగ్ తో ఇంటి సభ్యులతో కనెక్ట్ అయ్యి పంచ్ లు వేస్తూ….ఇంటి సభ్యులను సరదాగా ఆట పట్టిస్తూ వాళ్ళ సీక్రెట్స్ బట్టబయలు చేస్తూ షాక్ లోకి సమంత తనదైన శైలిలో దింపటం ప్రేక్షకులను ఎంతగానో రంజింపజేసింది.
నాగార్జున తన కొత్త సినిమా “వైల్డ్ డాగ్” షూటింగ్ కోసం హిమాలయాలకు వెళ్లడంతో… నాగార్జున స్థానంలో దసరా పండుగ నాడు వచ్చిన సమంత యాంకరింగ్ కి సోషల్ మీడియాలో నెటిజన్లు పొగడ్తలతో ముంచెత్తుతున్నారు. ఇలాంటి తరుణంలో తన హోస్టింగ్ పై మనసులో మాట ఇన్స్టాగ్రామ్ లో బయటపెట్టింది సమంత. ఇంస్టాగ్రామ్ లో సమంత ఏమని రాసింది అంటే…” నేను బిగ్బాస్ స్టేజీ మీద హోస్ట్గా చేస్తానని అస్సలు ఊహించలేదు.
కానీ మామయ్య నాకు బాధ్యతను అప్పగించడం వల్ల వ్యాఖ్యాతగా వ్యవహరించాను. అది ఎప్పటికీ గుర్తుండిపోతుంది. యాంకరింగ్ చేసిన అనుభవం లేదు. తెలుగు సరిగా మాట్లాడతానో లేదోన్న భయం ఉండేది. పైగా అంతకుముందు బిగ్బాస్ ఒక్క ఎపిసోడ్ కూడా చూడలేదు. అయినా సరే నన్ను నమ్మి బాధ్యతను అప్పగించి, నా భయాన్ని పోగొట్టినందుకు థ్యాంక్యూ మామా. ఎపిసోడ్ తర్వాత నాకు అందుతున్న ప్రేమాభిమానాలకు మీ అందరికీ కూడా ధన్యవాదాలు” అని సమంత రాసుకొచ్చింది.