భార‌తీయ జ‌న‌తాపార్టీతో పొత్తు పెట్టుకున్న ప‌వ‌న్ క‌ళ్యాణ్‌కు ఆ పార్టీ చుక్కలు చూపిస్తోంద‌ని ప్ర‌చారం జ‌రుగుతోంది. తిరుపతి లోక్‌సభ నియోజ‌క‌వ‌ర్గానికి జరగబోయే ఉప ఎన్నికలో బీజేపీ-జనసేన క‌లిసి పోటీ చేస్తున్నాయ‌ని పైకి క‌నిపించ‌డమే కానీ… బీజేపీ ఆదేశిస్తోంది….. ప‌వ‌న్ పాటిస్తున్నాడు అనే టాక్ వినిపిస్తోంది.
బీజేపీ పెద్ద ప‌నిలోనే ఉందిగా
తిరుపతి ఉప ఎన్నిక‌ను బీజేపీ ప్ర‌తిష్టాత్మ‌కంగా తీసుకుంది. దీనికి కార‌ణాలు కూడా ఉన్నాయి. 1999లో తిరుపతిలో బీజేపీ అభ్యర్ధి ఎంపీగా గెలిచారు. 2004లో రెండో స్థానం దక్కింది. కానీ.. తర్వాతి రోజుల్లో ఆ ఊపును నిలబెట్టుకోలేకపోయింది బీజేపీ. ఇప్పుడు రాష్ట్రంలో తామే ప్రత్యామ్నాయం అని భావిస్తున్న కమలనాథులు తమ శ్రేణులను, శక్తులను తిరుపతిలో మోహరింప చేస్తున్నాయి. ఈ క్ర‌మంలోనే తిరుపతిలో స్పీడ్‌ పెంచిన బీజేపీ.. లోక్‌సభ పరిధిలోని ఏడు అసెంబ్లీ నియోజకవర్గాల్లో బూత్‌ స్థాయి నుంచి పక్కా వ్యూహం అమలు చేస్తోంది. 45 మండలాల బూత్‌ కమిటీల బాధ్యతలను దాదాపు 15 మంది రాష్ట్రస్థాయి నాయకులకు అప్పగించి క్షేత్రస్థాయిలో పట్టు బిగించాలని అనుకుంటోంది.
సోము వీర్రాజు దూకుడు
తిరుపతి పార్ల‌మెంటు ఉప ఎన్నిక విష‌యంలో ఏపీ బీజేపీ చీఫ్‌ సోము వీర్రాజు క్రియాశీలంగా వ్య‌వ‌హ‌రిస్తున్నారు. పదే పదే తిరుపతి లోక్‌సభ పరిధిలో పర్యటనలకు ప్రాధాన్యం ఇస్తున్నారు. జాతీయస్థాయి నాయకులను తిరుపతికి రప్పిస్తున్నారు. పార్టీ రాష్ట్ర సహ ఇంఛార్జ్‌ సునీల్‌ దేవధర్‌ బూత్‌ కమిటీలను ఎప్పటికప్పుడు సమన్వయం చేస్తూ ఎలా పాగా వేయాలో చెబుతున్నారు. బీజేపీ రాష్ట్ర కార్యవర్గ సమావేశాలనే తిరుపతిలో ఏర్పాటు చేశారు. ఈ సమావేశాలకు చత్తీస్‌గఢ్‌ మాజీ సీఎం రమణ్‌సింగ్‌తోపాటు, బీజేపీ రాష్ట్ర ఇంఛార్జ్‌, కేంద్రమంత్రి మురళీధరన్‌ హాజరయ్యారు.
ఇందుకే ప‌వ‌న్ క‌ళ్యాణ్ లైట్ తీసుకున్నారా?
తిరుపతిలో బీజేపీ అభ్య‌ర్థే బ‌రిలో ఉంటార‌ని అధికారిక ప్ర‌క‌ట‌నే మిగిలింద‌ని ఆ పార్టీ వ‌ర్గాలు అంటున్నాయి. దీనికి కార‌ణం సైతం ఉంది. కిందటి ఎన్నికల్లో తిరుపతి లోక్‌సభ సీటులో జనసేన పోటీ చేయకుండా BSPకి మద్దతు ఇచ్చింది. 20వేల ఓట్లే వచ్చాయి. ఈ నేప‌థ్యంలోనే బీజేపీ తమ అభ్య‌ర్థిని బ‌రిలోకి దింప‌డం ఖాయ‌మ‌ని చెప్తున్నారు.
