అహ్మదాబాద్: నీటి సమస్య పరిష్కరించాలని కోరడానికి వచ్చిన మహిళపై అధికార బిజెపి ఎమ్మెల్యే అమానుషంగా ప్రవర్తించాడు. గుజరాత్లోని నరోరా ప్రాంతంలో నీటి కొరత తీర్చాలని కోరుతూ ఎన్సిపికి చెందిన నీతూ తేజ్వానీ మరి కొందరు మహిళలతో బిజెపి ఎమ్మెల్యే బలరాం తవానీ వద్దకు వెళ్లారు. తమ సమస్యను వెంటనే పరిష్కరించాలని డిమాండ్ చేశారు. సమస్య పరిష్కరించకుంటే ఆందోళన చేపడతామని ఈ సందర్భంగా నీతూ తేజ్వానీ ఎమ్మెల్యే బలరాం తవానీని హెచ్చరించారు. దానితో ఆగ్రహానికి గురైన బలరాం, ఆయన సోదరుడు ఆమెపై చేయిచేసుకున్నారు. ఆమె కిందపడిపోగా కాలితో తన్నుతూ అమానుషంగా ప్రవర్తించారు. నీతూ భర్తపైనా దాడి చేశారు. ఘటనపై బాధితురాలు నీతూ పోలీసులకు ఫిర్యాదు చేసింది. ఆమె స్వల్పంగా గాయపడగా చికిత్స నిమిత్తం ఆసుపత్రికి తరలించారు.
ఈ ఘటనను కొందరు సెల్ ఫోన్ ద్వారా వీడియో తీసి సోషల్ మీడియాలో పోస్టు చేశారు. ప్రస్తుతం ఈ వీడియో సోషల్ మీడియాలో వైరల్ అవ్వడంతో బలరాంపై విమర్శలు వెల్లువెత్తాయి.
వీడియో హింధూస్థాన్ టైమ్స్ సౌజన్యంతో….