ప్రస్తుత టెక్నాలజీ లో బ్రౌజింగ్ చేయని మనిషే లేడంటే నమ్మశక్యం కాదు. మనిషిని బ్రౌజింగ్ వేరు చేయలేనంత పరిస్థితి వచ్చేసింది. పొద్దున లేచింది మొదలు రాత్రి పడుకునే వరకు మొబైల్లోనో, కంప్యూటర్, ట్యాబ్, లాప్టాప్ ఇలా ఏదో ఒక దానిలో బ్రౌజింగ్ చేస్తూనే ఉంటాం. కొంతమంది వర్క్ కోసం చేస్తుంటారు. మరికొంతమంది బోర్ కొట్టినప్పుడు సోషల్ మీడియా, ట్రెండింగ్ అంశాలు ఇలా ఎదో ఒకటి బ్రౌజ్ చేస్తుంటారు. అయితే ఇలా బ్రౌజింగ్ చేస్తూనే డబ్బులు సంపాదించే అవకాశం ఉంది. ప్రముఖ వెబ్ బ్రౌజర్ “ఒపేరా” లో బ్రౌజింగ్ చేసి మీ అనుభవాన్ని పంచుకుంటే చాలు ఏకంగా లక్షల పారితోషికం ఇస్తామని ప్రకటించింది.
ఓపెరా మినీ ప్రపంచంలోనే అత్యంత ప్రాచుర్యం పొందిన బ్రౌజర్ లో ఇది ఒకటి. ట్రెండింగ్ విషయాలను అనుసరించడానికి తాజా వీడియోలను భాగస్వామ్యం చేస్తుంది. నార్వేకు చెందిన ఈ కంపెనీ ఎప్పటికప్పుడు వినియోగదారునిని ఆకట్టుకునే ప్రయత్నం చేస్తుంది. ఆ క్రమంలోనే ఇటీవల ఒక ఉద్యోగానికి దరఖాస్తులు కోరుతూ ప్రకటన విడుదల చేసింది. ఎంపికైన అభ్యర్థి రెండు వారాల పాటు బ్రౌజర్ లో బ్రౌజింగ్ చేయాలి. అలా చేసిన వారికి 6.7లక్షల పారితోషికంగా ఇస్తామని తెలిపింది. పరిమిత వ్యవధి ఉన్న ఈ ఉద్యోగానికి ప్రపంచవ్యాప్తంగా ఎవరైనా ఒపేరా అధికారిక వెబ్సైట్లో దరఖాస్తు చేసుకోవచ్చు. అయితే అన్ని ఉద్యోగాలకు దరఖాస్తు చేసుకున్నట్టుగా అప్లికేషన్ ఫారం అవసరం లేదు.
అంతర్జాలంలో తాజా అప్డేట్స్, ట్రెండింగ్, విచిత్ర అంశాలు, మీన్స్, లైవ్ స్ట్రీమింగ్ ఇలా అన్నింటిని బ్రౌజర్ ద్వారా శోధించి, పరిశీలించాలి. తరువాత ఈ బ్రౌజర్ వాడినప్పుడు కలిగిన అనుభవాలను సోషల్ మీడియా తో పంచుకోవాలి. మీ జీవితంలో గుర్తుండిపోయే విధంగా బ్రౌజింగ్ చేయాల్సి వచ్చిన సంఘటనలు వివరిస్తూ 15-60 సెకన్ల వీడియో చేసి అప్లోడ్ చేయడమే. అక్టోబర్ చివరి వారంలో దరఖాస్తులు ప్రారంభం కాగా నవంబర్ 13 చివరి తేదీ గా ఉంది. దరఖాస్తు ప్రక్రియ పూర్తయిన తర్వాత ఎంపికైన అభ్యర్థిని రెండు వారాల పాటు పర్సనల్ బ్రౌజర్ గా నియమించుకొని పారితోషకం ఇవ్వనుంది. మరి ఇంకెందుకు ఆలస్యం మీరుకూడా ప్రయత్నించి చూడండి.