మండపేట: వైసిపి ఎన్నికల ప్రచారంలో మరోసారి అపశృతి చోటు చేసుకుంది. భవనం పిట్ట గోడ కూలిన ఘటనలో పలువురు వైసిపి కార్యకర్తలు గాయపడ్డారు.
తూర్పు గోదావరి జిల్లా మండపేటలో వైసిపి అధినేత జగన్ ఎన్నికల ప్రచారం నిర్వహించారు. జగన్ సభాస్థలి సమీపంలో కార్యకర్తలు భవనాల పైకి ఎక్కారు.
అందులో ఒక భవనం పిట్ట గోడ కూలింది. భవనంపైన ఉన్న కార్యకర్తలు కొందరు కింద పడిపోయారు. భవనం కింద ఉన్న వారు కూడా ఈ ఘటనలో గాయపడ్డారు.
ఈ ఘటనలో ఒక మహిళ మృతిచెందగా సుమారు 50 మందికి గాయాలయ్యాయి. క్షతగాత్రులకు మండపేట ప్రభుత్వ ఆస్పత్రితో పాటు రెండు ప్రైవేటు ఆస్పత్రుల్లో చికిత్స అందిస్తున్నారు. వీరిలో పలువురి పరిస్థితి విషమంగా ఉన్నట్లు తెలుస్తోంది. గాయపడిన వారిలో ఈటివి ప్రతినిధి వెంకటరమణ సహా మరికొందరు మీడియా ప్రతినిధులు ఉన్నారు. జగన్ ఆస్పత్రులకు వెళ్లి క్షతగాత్రులను పరామర్శించారు.
నెరిమర్ల నియోజకవర్గం డెంకాడలోనూ ఈ నెల 17 న ఇలాంటి ఘటనే చోటుచేసుకుంది. ఆ ఘటనలో దాదాపు 10 మందికి పైగా గాయపడ్డారు.
