నిత్యం వాకింగ్ చేయడం వల్ల మనకు ఎన్నో లాభాలు కలుగుతాయన్న సంగతి తెలిసిందే. వాకింగ్ వల్ల కండరాలు దృఢంగా మారుతాయి. టైప్ 2 డయాబెటిస్, గుండె జబ్బులు, ఆస్టియోపోరోసిస్ రాకుండా ఉంటాయి. ఎముకలు దృఢమవుతాయి. శరీర రోగ నిరోధక శక్తి పెరుగుతుంది. అయితే నిత్యం 30 నిమిషాల పాటు వాకింగ్ చేస్తే బరువు తగ్గవచ్చా..? అని చాలా మంది సందేహానికి గురవుతుంటారు. అలాంటి వారి కోసం వైద్య నిపుణులు ఏమని సమాధానం చెబుతున్నారంటే…
నిత్యం 30 నిమిషాల పాటు బ్రిస్క్ వాకింగ్ చేయడం వల్ల దాదాపుగా 150 క్యాలరీల వరకు ఖర్చవుతాయి. దీని వల్ల బరువు నియంత్రణలో ఉంటుంది. లేదా కొందరు బరువు తగ్గుతారు. అయితే కచ్చితంగా బరువు తగ్గాలని భావించే వారు 30 నిమిషాల కన్నా ఎక్కువ సమయం పాటు నిత్యం వ్యాయామం చేయాల్సి ఉంటుందని అంటున్నారు. కనీసం 60 నుంచి 90 నిమిషాల పాటు నిత్యం వాకింగ్ చేస్తే దాని వల్ల కచ్చితంగా బరువు తగ్గుతారని అంటున్నారు. అదే కేవలం 30 నిమిషాల పాటు మాత్రమే చేస్తే బరువు నియంత్రణలో ఉంటుందని, కానీ కేవలం కొందరు మాత్రమే బరువు తగ్గుతారని అంటున్నారు. అది శరీర తత్వాన్ని బట్టి ఉంటుందంటున్నారు.
అయితే బరువు తగ్గాలనుకునే వారు నిత్యం 60 నుంచి 90 నిమిషాల పాటు వాకింగ్ చేయాలని, నియంత్రణలో ఉండాలని అనుకుంటే నిత్యం 30 నిమిషాలు వాకింగ్ చేసినా చాలని అంటున్నారు. ఇక బరువుతో సంబంధం లేని వారు కూడా నిత్యం 30 నిమిషాల పాటు వాకింగ్ చేస్తే అనారోగ్య సమస్యల బారిన పడకుండా ఆరోగ్యంగా ఉండవచ్చని వైద్య నిపుణులు చెబుతున్నారు.