సుశాంత్ సింగ్ ఆత్మహత్య కేసును సీబీఐ చేతికి అప్పగిస్తూ కేంద్రం నిర్ణయం తీసుకున్న విషయం తెల్సిందే. ఈ విషయంలో సీబీఐ రంగంలోకి దిగింది. ఈ కేసుతో సంబంధం ఉన్న సుశాంత్ గర్ల్ ఫ్రెండ్ రియా చక్రవర్తిపై ఎఫ్ఐఆర్ నమోదు చేసింది.
రియాతో పాటు ఇంద్రజిత్‌ చక్రవర్తి, సంధ్యా చక్రవర్తి, షోయిక్‌ చక్రవర్తి, శామ్యూల్‌ మిరంద, శ్రుతి మోదీ మరియు ఇతరుల పేర్లను ఎఫ్ఐఆర్ లో పొందుపరిచింది. ఐపీఎస్‌ అధికారి మనోజ్‌ శశిధర్‌ నేతృత్వంలో ప్రత్యేక బృందాన్ని సీబీఐ ఏర్పాటు చేసింది. డీఐజీ గగన్‌దీప్‌ గంభీర్ విచారణను పర్యవేక్షించనున్నారు. సీబీఐ అధికారులు ఇప్పటికే కేసుకు అవసరమైన పత్రాల కోసం బీహార్ పోలీసులను సంప్రదించారు. మరోవైపు ఈడీ వర్గాలు రియా సన్నిహితుడు శ్యామ్యూల్‌ మిరందాను, సుశాంత్ సింగ్ సీఏ సందీప్ శ్రీధర్ ను ప్రశ్నించారు.
