మీకు అదిరింది సినిమా గుర్తుందా? తమిళ హీరో విజయ్ నటించిన సినిమా అది. ఆ సినిమాలో విజయ్ 5 రూపాయలకే అందరికీ వైద్యం అందిస్తుంటాడు. ఆ సినిమా తీయడానికి స్ఫూర్తి ఎవరో తెలుసా? డాక్టర్ వి. తిరువేంకటం. అవును.. తిరువేంకటం అనే డాక్టర్ కేవలం 5 రూపాయలకే వైద్యం అందించేవారు. ఆయన్ను స్ఫూర్తిగా తీసుకొని ఆ సినిమా తీశారు.
అయితే.. 5 రూపాయలకే పేదలందరికీ వైద్యం చేసిన ఆ డాక్టర్ ఇక లేరు. ఆయన గుండెపోటుతో మరణించారు. ఆయన వయసు 70 సంవత్సరాలు. చెన్నైలో 5 రూపాయల డాక్టర్ గా ఆయన ఎంతో ఖ్యాతి గడించారు. ఆయన చనిపోయే వరకు కూడా 5 రూపాయలకే వైద్యం అందించారు.
1973లో చెన్నైలోని వ్యాసరపాడిలో ఆయన క్లీనిక్ ను ప్రారంభించారు. అప్పటి నుంచి ఇప్పటి వరకు డబ్బు సంపాదించటమే ధ్యేయంగా కాకుండా… పేదలకు సరైన వైద్యం అందాలన్న సదుద్దేశంతో ఆయన తక్కువ ఫీజుతో అన్ని రకాల వైద్యాలు చేసేవారు. అందుకే తన వైద్యానికి ఆయన కేవలం 5 రూపాయలు మాత్రమే తీసుకునేవారు.
తన వైద్య వృత్తిలో భాగంగా ఆయన ఏనాడూ సెలవు తీసుకోలేదట. ప్రతి రోజు తన క్లీనిక్ కు వచ్చే రోగులకు వైద్యం అందించేవారు. ఒక్క లాక్ డౌన్ సమయంలోనే తిరువేంకటం క్లీనిక్ ను నెల రోజుల పాటు మూసేశారట. ఆ తర్వాత కూడా ఆయన తన క్లీనిక్ ను తెరిచి పేదలకు వైద్యం అందించారు.
తను తీసుకున్న 5 రూపాయలను కూడా మెడిసిన్స్ కొనుక్కోలేని పేదల కోసం ఆయన ఖర్చు పెట్టేవారు. అలా దాదాపు 45 ఏళ్ల పాటు చెన్నై, చుట్టు పక్కల వాసులకు వైద్య సేవల్ని అందించారు.
వైద్య వృత్తిని వ్యాపారం చేసి కోట్లు గడిస్తున్న ఈరోజుల్లో కేవలం 5 రూపాయలకే ఎంతో ఖరీదైన వైద్యం చేసి ఎంతో మందికి ఆదర్శంగా నిలిచిన ఈ డాక్టర్ కు మనమంతా సలాం కొట్టాల్సిందే.
