Chiranjeevi: మెగాస్టార్ చిరంజీవి Chiranjeevi కెరీర్లో సాధించిన ఇండస్ట్రీ హిట్లు తెలుగులో మరే హీరో సాధించలేదు. 9 ఇండస్ట్రీ హిట్స్ తో (ఒక నాన్ బాహుబలి) తిరుగులేని రికార్డు మెగాస్టార్ సొంతం. ఓదశలో 1987 నుంచి 1992 వరకూ వరుసగా ప్రతి ఏడాదీ ఓ ఇండస్ట్రీ హిట్ ఇచ్చి తెలుగు సినిమాపై తిరుగులేని ఆధిపత్యం సాధించారు. ఈ వరుసలో వచ్చిన ఓ ఇండస్ట్రీ హిట్ ‘గ్యాంగ్ లీడర్’. అప్పటికే నెంబర్ వన్ హీరోగా, మెగాస్టార్ గా ఉన్నా.. ఈ సినిమా సాధించిన సంచలన విజయం చిరంజీవిని తిరుగులేని స్థానంలో నిలబెట్టింది. 1991 మే 9న విడుదలైన ఈ సినిమా నేటితో 30 ఏళ్లు పూర్తి చేసుకుంది.
చిరంజీవి ప్రభ అప్రతిహతంగా వెలిగిపోతున్న దశలో వచ్చిందీ సినిమా. మాస్, ఫ్యామిలీ కథాంశంతో తెరకెక్కిన ఈ సినిమా ప్రేక్షకుల్ని విపరీతంగా ఆకట్టుకుంది. సినిమాలో చిరంజీవి బాడీ లాంగ్వేజ్, మాస్ మేనరిజమ్స్, స్టయిల్, డైలాగ్ డిక్షన్.. అభిమానులకు కిక్కెక్కించాయి. నలుగురు స్నేహితులకు లీడర్ గా, పెద్ద కుటుంబానికి దిక్కుగా.. చిరంజీవితో నట విశ్వరూపం చూపించారు దర్శకుడు విజయబాపినీడు. మొదట బాపినీడు ఈ కథను చిరంజీవికి చెప్తే పెద్దగా నచ్చలేక పక్కన పెట్టారట. అయితే.. పరుచూరి బ్రదర్స్ స్వయంగా ఈ విషయం తెలుసుకుని బాపినీడు గారితో మూడు రోజులు టైమ్ అడిగి మార్పులు చేసి మళ్లీ చిరంజీవికి వినిపిస్తే.. అద్భుతం.. సినిమా చేద్దామన్నారట. తర్వాత ఈ సినిమా బాక్సాఫీస్ కలెక్షన్లలో ఓ ప్రభంజనమే సృష్టించింది.
బప్పీలహరి అందించిన సంగీతంలోని పాటలన్నీ బ్లాక్ బస్టర్ హిట్టయ్యాయి. ఈ పాటలకు సినిమాలో చిరంజీవి చేసిన డ్యాన్సులకు ధియేటర్లలు దద్దరిల్లిపోయాయి. చిరంజీవి-విజయశాంతి కాంబినేషన్ ఆకట్టుకుంది. మాగంటి రవీంద్రనాధ్ చౌదరి నిర్మాతగా శ్యాంప్రసాద్ ఆర్ట్స్ బ్యానర్ పై ఈ సినిమా నిర్మించారు. అంతకుముందు ఏడాది జగదేకవీరుడు అతిలోక సుందరి సినిమాతో చిరంజీవే సృష్టించిన ఇండస్ట్రీ రికార్డును గ్యాంగ్ లీడర్ తో చెరిపేసి సరికొత్త ఇండస్ట్రీ రికార్డు నెలకొల్పారు. ‘చెయ్యి చూడు ఎంత రఫ్ గా ఉందో.. రఫ్ఫాడించేస్తాను’ అనే డైలాగ్ పేలిపోయింది. ఇప్పటికీ ఆ డైలాగ్ పాపులరే. ఈ సినిమా శతదినోత్సవ వేడుకలను ఒకేరోజు హైదరాబాద్, తిరుపతి, విజయవాడ, ఏలూరు నగరాల్లో హెలికాఫ్టర్లలో వెళ్లి నిర్వహించడం విశేషం.