కరోనా చేస్తున్న విలయం అంతా ఇంతా కాదు. ప్రజలంతా చిగురుటాకులా వణికిపోతున్నారు. ఏం చేయాలన్నా.. ముట్టుకోవాలన్నా.. ఎక్కడికెళ్లాలన్నా.. చివరికి సాటి మనిషిని చూస్తేనే భయం కలిగే పరిస్థితులు వచ్చాయి. అంతగా ప్రపంచాన్ని గడగడలాడించేస్తోంది ఈ మహమ్మారి. రోజురోజుకీ కరోనా బారిన పడుతున్న వారి సంఖ్య పెరుగుతోంది. పాజిటివ్ తో ఆసుపత్రుల్లో చేరిన వారిలో మరణాల సంఖ్య పెరుగుతోంది. కోలుకుంటున్న వారి సంఖ్య కూడా పెరుగుతోంది. అలా కోలుకున్న వారు పునర్జన్మ ఎత్తినట్టే భావిస్తున్నారు. అలా కోలుకున్నవారిని చూసి కుటుంబసభ్యులు సంతోషిస్తున్నారు. పూణెలోని ఓ యువతి తన అక్క కరోనా నుంచి కోలుకుని ఇంటికి రాగానే ఇలానే సంతోషించింది. కాకపోతే మరింత వరైటీగా.
పూణెలోని ఓ కుటుంబంలో కరోనా సోకింది. అక్కా చెల్లెళ్లలో అక్కకు కరోనా సోకింది. ఆమె ఇల్లు ఉన్న ప్రాంతాన్ని రెడ్ జోన్ గా ప్రకటించారు కూడా. ఆమెను ఆసుపత్రిలో జాయిన్ చేశారు. చికిత్స తీసుకుని ఆమె కోలుకుని ఇంటికి తిరిగి వచ్చింది. దీంతో ఫ్యామిలీ అంతా ఆనందంలో మునిగిపోయింది. అయితే.. ఆమె చెల్లెలు మాత్రం ఇందుకు భిన్నంగా అక్కకు స్వాగతం పలికింది. ఏకంగా రోడ్డు మీదకు వచ్చి అక్కకు తీన్ మార్ డ్యాన్స్ తో స్వాగతం పలికింది. పట్టరాని సంతోషంతో చెల్లెలు చేస్తున్న డ్యాన్స్ తో అక్క కూడా కాలు కదిపింది. ఆమెకు హారతులతో స్వాగతం పలికారు. ప్రస్తుతం ఈ వీడియో ఇంటర్నెట్ లో వైరల్ అయింది. ఇది కరోనా డాన్స్ అంటూ నెటిజన్లు అక్కాచెల్లెళ్ల ఆనందాన్ని చూసి సంతోషిస్తున్నారు.