Covid 19 Vaccine: కరోనా మహమ్మారి నివారణకు ఇంత వరకూ ప్రత్యేకించి మందులను కనిపెట్టలేదు. ఈ మహమ్మారిని జయించేందుకు వ్యాక్సినేషన్ ఒక్కటే మార్గం అని నిపుణులు సూచిస్తున్న నేపథ్యంలో దేశంలో అందరికీ సాధ్యమైనంత త్వరగా వ్యాక్సిన్ వేయాలని కేంద్రం ప్రభుత్వం ప్రయత్నం చేస్తున్న సంగతి తెలిసిందే. ఈ క్రమంలో భాగంగా ప్రస్తుతం అందుబాటులో ఉన్ వ్యాక్సిన్ లతో పాటు మరికొన్ని వ్యాక్సిన్ లకు కూడా అనుమతి ఇవ్వాలని కేంద్రం నిర్ణయించింది. తాజాగా స్వదేశంలో తయారైన మరో వ్యాక్సిన్.. జైడస్ క్యాడిలా ఉత్పత్తి చేసిన జైకోవ్ డీ వ్యాక్సిన్ కు డీసీజీఐ అత్యవసరర వినియోగానికి అనుమతి ఇచ్చింది. భారత్ లో కరోనా వైరస్ కోసం అత్యవసర అనుమతి పొందిన వ్యాక్సిన్ లలో జైడస్ క్యాడిలా వ్యాక్సిన్ అయిదవది.
ఇప్పటికే మనదేశంలో కోవిషీల్డ్, కోవిగ్జిన్, స్పుత్నిక్ వి, మోడెర్నాలకు డీసీజీఐ అనుమతి ఇచ్చింది. ఇప్పుడు తాజాగా జైడస్ క్యాడిలా టీకాకు కేంద్రం గ్రీన్ సిగ్నల్ ఇచ్చింది. వీటితో పాటు మరి కొన్ని వ్యాక్సిన్లకు కూడా త్వరలో అనుమతులు లభించే అవకాశం ఉందని తెలుస్తోంది. డీఎన్ఏ ఫ్లాట్ ఫాం మీద రూపొందించిన టీకా జైకోవ్ డీ దేశంలో అత్యవసర వినియోగానికి అనుమతి ఇస్తున్నట్లు డీసీజీఐ ఓ ప్రకటనలో తెలిపింది. 12 సంవత్సరాలు దాటిన చిన్నారులతో సహా పెద్దలు అందరూ ఉపయోగించేందుకు ఈ టీకా వీలు ఉంటుందని పేర్కొంది.