తెలుగు చిత్ర పరిశ్రమకు చెందిన ప్రముఖ నటుడు దగ్గుబాటి రానా త్వరలో ఓ ఇంటి వాడు అవుతున్నారు. ఆయన మనసు దోచుకొని అర్ధాంగి కాబోతున్న యువతి ఎవరో తెలుసుకోవాలని ఆసక్తి ఉందా?. అయితే ఆమె ఎవరో రానానే తెలియచేసారు.
35 ఏళ్ళ దగ్గుబాటి రానా తన ప్రేమ విషయాన్ని ప్రపంచానికి తెలియజేశాడు. లవ్ సింబల్ తో మిహిక బజాజ్ అనే యువతి ఫొటోను తన ట్విట్టర్ ఖాతాలో పోస్ట్ చేస్తూ.. ‘ఆమె అంగీకారం తెలిపింది..’ అని పేర్కొన్నారు. అతని ప్రేమకు పెద్దవాళ్ల నుంచి అంగీకారం వచ్చినందు వల్లే బాహాటంగా పోస్ట్ చేశాడని భావిస్తున్నారు. అయితే ఈ విషయమై ఇరు కుటుంబాల నుంచి అధికారిక ప్రకటన వెలువడాల్సి ఉంది.
మిహిక బజాజ్ ఎవరంటే
ప్రముఖ ఫ్యాషన్ డిజైనర్ బంటీ బజాజ్ కుమార్తె మిహిక బజాజ్. వీరు హైదరాబాద్ నివాసులే. ప్రస్తుతం ముంబైలో డ్యూ డ్రాప్ డిజైన్ స్టూడియో పేరిట ఓ ఈవెంట్ మేనేజ్ మెంట్, డెకరేషన్ సంస్థను నడుపుతోంది. ఇండియన్ ఆర్కిటెక్చర్ అంటే ఇష్టపడే మిహిక.. ముంబయిలోని రచన సంసద్ విద్యాలయం నుంచి ఇంటీరియర్ డిజైనింగ్‌లో డిప్లొమా చేశారు. లండన్‌లోని చెల్సియా యూనివర్సిటీలో ఆర్ట్ అండ్ డిజైనింగ్‌లో ఎంఏ పూర్తి చేసింది.
రానాకు మిహిక ఎప్పుడు, ఎక్కడ, ఎలా పరిచయమైంది? వారి మధ్య ప్రేమ ఎలా చిగురించింది? అనే విషయాలను వారే త్వరలో వెల్లడించే అవకాశముంది.
